អាជ្ញាធរបាននិយាយថា អ្នកដំណើរជនជាតិអ៊ីស្រាអែលនិងបរទេសជាច្រើននាក់ បានជាប់គាំងខ្លួនកាលពីថ្ងៃអាទិត្យ ទី៤ ឧសភា នៅអាកាសយានដ្ឋាន Ben Gurion របស់អ៊ីស្រាអែល ខណៈក្រុមហ៊ុនអាកាសចរណ៍អឺរ៉ុបនិងសហរដ្ឋអាមេរិក បានលុបចោលជើងហោះហើរជាច្រើនជើងសម្រាប់ជាច្រើនថ្ងៃបន្ទាប់ទៀត ក្រោយមីស៊ីលដែលត្រូវបានបាញ់ដោយក្រុមឧទ្ទាមហ៊ួទីនៅប្រទេសយេម៉ែន បានធ្លាក់នៅជិតអាកាសយានដ្ឋានអន្តរជាតិដ៏សំខាន់របស់ប្រទេស។

ក្រុមហ៊ុនអាកាសចរណ៍បរទេសជាច្រើន បានផ្អាកជើងហោះហើរទៅ និងមកពីទីក្រុង Tel Aviv ជាបន្តបន្ទាប់។ បន្ទាប់ពីកិច្ចព្រមព្រៀងបទឈប់បាញ់ជាមួយក្រុមសកម្មប្រយុទ្ធហាម៉ាសប៉ាឡេស្ទីន កាលពីខែមករា ក្រុមហ៊ុនអាកាសចរណ៍បរទេស បានចាប់ផ្តើមបន្តជើងហោះហើរទៅកាន់ប្រទេសអ៊ីស្រាអែល បន្ទាប់ពីបានផ្អាកភាគច្រើនកាលពីឆ្នាំមុន ទោះបីជាមានសមត្ថភាពតិចជាងមុនក៏ដោយ។

ដោយអះអាងការទទួលខុសត្រូវចំពោះការវាយប្រហារដែលបានបញ្ជូនផ្សែងហុយទៅលើអាកាស និងបង្កឱ្យមានការភ័យខ្លាចក្នុងចំណោមអ្នកដំណើរនៅក្នុងចំណតអាកាសយានដ្ឋាននោះ អ្នកនាំពាក្យយោធារបស់ក្រុម ហ៊ួទី លោក Yahya Saree បាននិយាយថា អាកាសយានដ្ឋានសំខាន់របស់អ៊ីស្រាអែល «លែងមានសុវត្ថិភាពសម្រាប់ការធ្វើដំណើរតាមផ្លូវអាកាសទៀតហើយ»។

ក្រុមហ៊ួទី ដែលគ្រប់គ្រងទឹកដីប្រទេសយេម៉ែន បានចាប់ផ្តើមដាក់គោលដៅលើអ៊ីស្រាអែល និងការដឹកជញ្ជូននៅសមុទ្រក្រហមនៅចុងឆ្នាំ២០២៣ ក្នុងអំឡុងពេលដំបូងនៃសង្រ្គាមរវាងក្រុមហាម៉ាស និងអ៊ីស្រាអែល នៅតំបន់ហ្កាហ្សាស្ទ្រីប។ ប្រធានាធិបតីសហរដ្ឋអាមេរិក លោក Donald Trump កាលពីខែមីនា បានបញ្ជាឱ្យធ្វើការវាយប្រហារទ្រង់ទ្រាយធំប្រឆាំងក្រុមហ៊ួទី ដើម្បីកាត់បន្ថយសមត្ថភាពរបស់ក្រុមនេះ និងរារាំងពួកគេមិនឱ្យដាក់គោលដៅលើការដឹកជញ្ជូនពាណិជ្ជកម្មនៅសមុទ្រក្រហម។