ប្រធានាធិបតីអាមេរិក លោក ដូណាល់ ត្រាំ បានបដិសេធមិនឆ្លើយសំណួររបស់អ្នកយកព័ត៌មាន Wall Street Journal អំពីកិច្ចពិភាក្សារបស់លោក ជាមួយមេដឹកនាំរុស្ស៊ី លោក វ្ល៉ាឌីមៀ ពូទីន។

អ្នកយកព័ត៌មានរបស់កាសែតនេះ បានព្យាយាមសួរទៅកាន់ប្រមុខរដ្ឋរូបនូវសំណួរមួយ ប៉ុន្តែលោក ត្រាំ បានសួរជាលើកដំបូងថាតើលោកតំណាងឲ្យប្រព័ន្ធផ្សព្វផ្សាយណា។ លោកប្រធានាធិបតីអាមេរិកបាននិយាយ នៅពេលថ្លែងទៅកាន់អ្នកសារព័ត៌មាននៅលើយន្តហោះរបស់លោក ដែលហោះហើរពីរដ្ឋហ្វ្លរីដា ទៅទីក្រុងវ៉ាស៊ីនតោនថា៖«អ្នកធ្វើកំពុងធ្វើបាបពួកយើងយ៉ាងធ្ងន់ធ្ងរ។ សារព័ត៌មាន Wall Street Journal ពិតជាធ្លាក់នរក ជាមិនខានទេ។ ចូរបន្តដំណើរការតទៅទៀតចុះ។ នេះគឺជាសារព័ត៌មានដ៏អាក្រក់មួយ»។ 

នៅពេលសួរអំពីកិច្ចពិភាក្សាជាមួយលោក ពូទីន លោក ត្រាំ បាននិយាយថា៖«ខ្ញុំនឹងមិនប្រាប់សារព័ត៌មាន Wall Street Journal ទេ ព្រោះខ្ញុំនឹងខ្ជះខ្ជាយពេលវេលា។ មានកិច្ចពិភាក្សា ប៉ុន្តែខ្ញុំមិនចង់និយាយជាមួយសារព័ត៌មាននេះទេ។ 

កាលពីថ្ងៃទី ២៥ ខែមេសា លោក ពូទីន និងបេសកជនពិសេសរបស់ប្រធានាធិបតីអាមេរិក លោក Steve Witkoff បានជួបប្រជុំគ្នាជាលើកទី៤ ក្នុងឆ្នាំនេះ។ ជំនួយការរបស់វិមានក្រឹមឡាំង លោក Yury Ushakov បាននិយាយថា ការសន្ទនាមានរយៈពេល ៣ម៉ោង ហើយ «មានលក្ខណៈស្ថាបនា និងមានប្រយោជន៍យ៉ាងច្រើន»។