រដ្ឋាភិបាលប្រទេសនូវែលសេឡង់ បាននិយាយកាលពីថ្ងៃអាទិត្យ (០៤ ឧសភា) ថា ខ្លួនបានត្រៀមថវិកាចំនួន ២ពាន់លានដុល្លារនូវែលសេឡង់ ឬស្មើនឹង ១,១៩ពាន់លានដុល្លារអាមេរិក នៅក្នុងថវិកាជាតិនាពេលខាងមុខរបស់ខ្លួន ដើម្បីជំនួសឧទ្ធម្ភាគចក្រដែនសមុទ្រដ៏ចំណាស់របស់កងកម្លាំងការពារជាតិ ខណៈភាពតានតឹងពិភពលោកកើនឡើងខ្លាំង។

ទន្ទឹមនឹងប្រាក់សម្រាប់ឧទ្ធម្ភាគចក្រថ្មីនេះ រដ្ឋាភិបាលបាននិយាយថា ខ្លួននឹងបង្កើនការចំណាយមូលដ្ឋានចំនួន ២៣៩លានដុល្លារនូវែលសេឡង់ សម្រាប់កងកម្លាំងការពារជាតិ ជារៀងរាល់ឆ្នាំក្នុងពេល ៤ឆ្នាំខាងមុខ។

លោកស្រី Judith Collins រដ្ឋមន្ត្រីក្រសួងការពារជាតិនូវែលសេឡង់ បាននិយាយនៅក្នុងសេចក្តីថ្លែងការណ៍មួយថា "ច្បាស់ណាស់ថា នូវែលសេឡង់មិនមានភាពស៊ាំពីភាពតានតឹង ដែលកំពុងកើនឡើងនៅជុំវិញពិភពលោកឡើយ"។ លោកស្រីបន្តថា រឿងនេះហើយធ្វើឱ្យនូវែលសេឡង់ បង្កើនការចំណាយលើវិស័យការពារជាតិដើម្បីឈានដល់ ២% នៃ GDP នៅឆ្នាំ ២០៣២-៣៣ ខាងមុខ"។

កងកម្លាំងការពាររបស់នូវែលសេឡង់ បានជួបការលំបាកជាមួយនឹងការចំណាយតិចជាប្រព័ន្ធ ក្នុងរយៈពេលជាច្រើនទសវត្សរ៍កន្លងមកនេះ ដែលស្មើនឹងជាង ១% នៃ GDP បច្ចុប្បន្នប៉ុណ្ណោះ។ កាលពីខែមេសា រដ្ឋាភិបាលបាននិយាយថា ខ្លួននឹងបង្កើនការចំណាយលើវិស័យការពារជាតិ ជាមួយនឹងមូលនិធិថ្មីចំនួន ៩ពាន់លានដុល្លារនូវែលសេឡង់ ក្នុងរយៈពេល ៤ឆ្នាំខាងមុខ ដើម្បីទប់ភាពតានតឹងសកល៕