កត្តារបស់លោក Donald Trump កំពុងជះឥទ្ធិពលដល់នយោបាយពិភពលោក ពោលគឺដល់ការបោះឆ្នោត ក្នុងពេលតែមួយ ដែលមិនស្របតាមការចង់បានរបស់លោកប្រធានាធិបតីអាមេរិកនោះឡើយ។

សម្រាប់ការបោះឆ្នោតសំខាន់ៗ នៅប្រទេសកាណាដា និងអូស្ត្រាលី ក្នុងរយៈពេល ២សប្តាហ៍កន្លងមកនេះ ក្រុមកណ្តាលនិយម បានឃើញជោគវាសនារបស់ពួកគេរស់រានឡើងវិញ ខណៈពេលដែលគណបក្សដែលបានសម្របតាមគោលនយបាយធ្វើឲ្យអាមេរិកអស្ចារ្យម្ដងទៀត (Make America Great Again) បានបរាជ័យ។

លោកប្រធានាធិបតីអាមេរិក Trump បានឡើងកាន់អំណាចត្រឹមតែ ៣ខែប៉ុណ្ណោះ ប៉ុន្តែគោលនយោបាយរបស់លោក ក្នុងនោះរួមទាំងការដំឡើងពន្ធ និងផ្ដល់ការរំខានសម្ព័ន្ធមិត្ត បានជះឥទ្ធិពលគ្រប់ទិសទីរួចហើយដល់សមរភូមិនយោបាយក្នុងប្រទេស នៅជុំវិញពិភពលោក។ បើទោះបីជាវាឆាប់ពេកដែលមិនអាចនិយាយបានថា កម្លាំងប្រឆាំងលោក Trump កំពុងតែកើនឡើងទូទាំងពិភពលោកក៏ដោយ ក៏វាច្បាស់ណាស់ថា អ្នកបោះឆ្នោតមានលោក Trump ក្នុងគំនិតរបស់ពួកគេ នៅពេលពួកគេសម្រេចចិត្តទម្លាក់សន្លឹកឆ្នោតទៅក្នុងធុង។

នៅក្នុងប្រទេសអូស្ត្រាលី មុនពេលលោក Trump ចូលកាន់តំណែង គណបក្សកាន់អំណាចកណ្តាល-ឆ្វេងនិយម មានសភាពអន់ថយ ហើយហាក់ដូចជា កំពុងត្រៀមបាត់បង់អំណាចទៀតផង។ អ្នកនាំមុខគេក្នុងការស្ទង់មតិ គឺគណបក្សអភិរក្សនិយម ដែលមេដឹកនាំនៃបក្សទាំងនោះ បានសម្របតាមយុទ្ធសាស្ត្រនយោបាយរបស់លោក Trump ទាំងរចនាប័ទ្ម និងខ្លឹមសារ។ ក្នុងរយៈពេលប៉ុន្មានសប្តាហ៍បន្ទាប់ពីការវិលទៅកាន់អំណាចរបស់លោក Trump សេណារីយ៉ូនយោបាយរបស់កាណាដា និងអូស្ត្រាលី បានផ្លាស់ប្តូរតាមរបៀបដូចគ្នា ដោយក្រុមកាន់អំណាចកណ្តាល-ឆ្វេងនិយម បានឡើងប្រជាប្រិយភាពលើក្រុមប្រឆាំងអភិរក្ស ហើយបានបន្តដោយជ័យជម្នះ។ មេដឹកនាំអភិរក្សរបស់ប្រទេសទាំង២ មិនត្រឹមតែចាញ់ការបោះឆ្នោតប៉ុណ្ណោះទេ តែពួកគេថែមទាំងបាត់បង់អាសនៈ នៅក្នុងសភាទៀតផង។

នាយករដ្ឋមន្ត្រីកាណាដា លោក Mark Carney បានធ្វើយុទ្ធនាការជាមួយនឹងសារយ៉ាងច្បាស់លាស់ប្រឆាំងលោក Trump ដោយយកការគំរាមកំហែងរបស់ប្រធានាធិបតីអាមេរិក ចំពោះកាណាដាជាបេះដូងនៃយុទ្ធនាការរបស់លោក។ នាយករដ្ឋមន្ត្រីអូស្ត្រាលី លោក Anthony Albanese មិនបានធ្វើដូច្នេះទេ។ ប៉ុន្តែមេដឹកនាំទាំង ២រូប បានប្រឆាំងនឹងលោក Trump៕