កាលពីថ្ងៃអាទិត្យម្សិលមិញ ប្រធានាធិបតីសហរដ្ឋអាមេរិកលោក Donald Trump និយាយថា លោកមិនបានដឹងអ្វីនោះទេចំពោះការបោះឆ្នោតកាលពីចុងសប្តាហ៍កន្លងទៅនៅអូស្រ្តាលី ជាទីដែលគណបក្សកាន់អំណាចការងារ បានផ្តួលគូប្រជែងអភិរក្សនិយម បើទោះបីជារូបលោកកោតសរសើរលោកនាយករដ្ឋមន្រ្តី Anthony Albanese ថាជាមិត្តរបស់លោកក៏ដោយ ។

លោក Trumpនិយាយប្រាប់ក្រុមអ្នកសារព័ត៌មាននៅសេតវិមានក្រោយចុះពីលើឧទ្ធម្ភាគចក្រ Marine One ថា លោកពុំបានដឹងអ្វីពីការបោះឆ្នោតនោះទេ ក្រៅពីដឹងថាមនុស្សម្នាក់ដែលបានឈ្នះ គឺជាមនុស្សល្អម្នាក់ ។

ការស្ទង់មតិបង្ហាញថា សម្ពាធចំណាយច្រើនលើការរស់នៅ និងក្តីកង្វល់ពីគោលនយោបាយរបស់លោក Trump ស្ថិតក្នុងចំណោមបញ្ហាសំខាន់ៗនៅការបោះឆ្នោតអូស្រ្តាលីកាលពីថ្ងៃសៅរ៍ ក្រោយផែនការដំឡើងពន្ធរបស់ប្រធានាធិបតីសហរដ្ឋអាមេរិក បានធ្វើឲ្យកើតមានភាពរំជើបរំជួលពេញទីផ្សារសកល និងបង្កឲ្យមានក្តីបារម្ភពីក្រុមអ្នកបោះឆ្នោតលើផលប៉ះពាល់មូលនិធិសោធននិវត្តន៍របស់ពួកគេ ។

លោក Albanese បានចាត់ទុកការដំឡើងពន្ធរបស់លោក Trumpថាមិនមែនជាទង្វើរបស់មិត្តនោះទេ ។

លោក Albanese បានវិលត្រឡប់មកកាន់អំណាចវិញសម្រាប់អាណត្តិទី ២ នៅការបោះឆ្នោតដ៏ប្រទាញប្រទង់គ្នាមួយជាមួយក្រុមចម្រុះជាតិសេរីនិយមដែលបាននាំមុខ អំឡុងការស្ទង់មតិកាលពីពេលកន្លងទៅ រហូតដល់ខែកុម្ភៈ ៕