ការប៉ះទង្គិចប្រដាប់អាវុធដ៏កម្រនៅប្រទេសឡាវ ដែលគេជឿថាមានការជាប់ពាក់ព័ន្ធជាមួយការរត់ពន្ធគ្រឿងញៀនខុសច្បាប់ បានបង្ខំឲ្យប្រទេសថៃបិទតំបន់ភ្នំទេសចរណ៍ដ៏ពេញនិយមរបស់ខ្លួន ដែលជាតំបន់ទេសភាពនៅតាមព្រំដែន ហើយនិងបង្ខំឲ្យមានការព្រមានសន្តិសុខពីសហរដ្ឋអាមេរិក ។

ក្រុមមន្រ្តីឧទ្យានជាតិថៃ និយាយកាលពីថ្ងៃចន្ទថា តំបន់ទេសចរណ៍ Phu Chi Fa នៅតាមព្រំដែនជាមួយឡាវ ស្ថិតក្នុងខេត្តភាគខាងជើងឈៀងរ៉ៃ ត្រូវបានបិទរហូតដល់មានការជូនដំណឹងបន្ថែមទៀត ។

ស្ថានទូតសហរដ្ឋអាមេរិកប្រចាំនៅទីក្រុងវៀងច័ន្ទ បានជំរុញឲ្យពលរដ្ឋអាមេរិកដែលគិតចង់ធ្វើដំណើរទៅកាន់ខេត្តបរកែវ ត្រូវគិតពិចារណាឡើងវិញ ក្រោយសេចក្តីរាយការណ៍ពីការប៉ះទង្គិចគ្នារវាងកងទ័ពឡាវ និងក្រុមប្រដាប់អាវុធគ្មានអត្តសញ្ញាណ ។

ស្ថានទូតអាមេរិកនិយាយនៅលើគេហទំព័ររបស់ខ្លួនថា ក្រុមមន្រ្តីក្នុងស្រុក បានស្នើបង្កើនកម្រិតសន្តិសុខ ដែលរួមទាំងការបង្កើនចំនួនប៉ុស្តិ៍ត្រួតពិនិត្យយោធា និងវត្តមានរបស់ទាហាន ។

ភាពរំជើបរំជួល កម្រកើតមាននៅប្រទេសកុម្មុយនិស្តឡាវ ប៉ុន្តែប្រទេសមួយនេះ ស្ថិតនៅតំបន់ត្រីកោណមាសដែលមានតំបន់ព្រំដែនជាមួយមីយ៉ាន់ម៉ា និងថៃ និងជាមជ្ឈមណ្ឌលជួញដូរគ្រឿងញៀនរកប្រាក់កម្រៃបានច្រើននៅអាស៊ីអាគ្នេយ៍ អស់រយៈពេលជាច្រើនទសវត្សរ៍មកហើយ ៕