ហៃទី៖ ប្រជាជនប្រទេសហៃទីបានធ្វើបាតុកម្មកាលពីថ្ងៃសុក្រ ដើម្បីតវ៉ាលើវិបត្តិសន្តិសុខដែលកំពុងបន្តនៅក្នុងប្រទេស ក៏ដូចជាការកើនឡើងនៃតម្លៃប្រេងឥន្ធនៈ។ ការកើនឡើងតម្លៃប្រេងដែលត្រូវបានបញ្ជាដោយប្រធានាធិបតីស្តីទីលោក Ariel Henry បានចូលជាធរមាន បន្ទាប់ពីរដ្ឋាភិបាលបានកាត់ការឧបត្ថម្ភធន។
ចាប់តាំងពីលោក Henry ឡើងបន្តកាន់តំណែងជាមេដឹកនាំប្រទេសហៃទី បន្ទាប់ពីការធ្វើឃាតលើអតីតប្រធានាធិបតីលោក Jovenel Moïse កាលពីថ្ងៃទី៧ ខែកក្កដា មានការខ្វះខាតប្រេងឥន្ធនៈធ្ងន់ធ្ងរ និងការកើនឡើងតម្លៃ និងការចាប់ជំរិតដែលពាក់ព័ន្ធជាមួយក្រុមជនអន្ធពាល។ ក្នុងការធ្វើបាតុកម្មនៅទីក្រុងព័រអូប្រាំង (Port Au Prince) ក្រុមបាតុករបានដុតកង់ឡាន និងដើរដង្ហែការតវ៉ាតាមផ្លូវក្នុងទីក្រុង។ យោងតាមការិយាល័យរបស់អង្គការសហប្រជាជាតិនៅក្នុងប្រទេសហៃទីបានឲ្យដឹងថា ការចាប់ជំរិតជាង 460ករណីត្រូវបានរាយការណ៍ដោយនគរបាលជាតិរបស់ប្រទេសហៃទី ដែលមកដល់ពេលនេះមានចំនួនច្រើនជាងពីរដង នៃអ្វីដែលបានរាយការណ៍កាលពីឆ្នាំមុន។ ឧក្រិដ្ឋកម្មដែលពាក់ព័ន្ធជាមួយក្រុមជនអន្ធពាល បានរារាំងក្រុមជំនួយមិនឲ្យចូលទៅកាន់តំបន់នានារបស់ប្រទេស ដែលក្រុមជំនួយធ្លាប់បានចែកចាយអាហារ ទឹក និងទំនិញជាមូលដ្ឋានផ្សេងទៀតកាលពីពេលមុន៕
អត្ថបទ៖ ប៊ុនថន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
