ក្រុមអាជ្ញាធររុស្ស៊ី និងមន្រ្តីក្រុមហ៊ុននិយាយនៅថ្ងៃពុធនេះថា មនុស្ស ៤នាក់ បានរងរបួស ក្នុងហេតុការណ៍អគ្គិភ័យឆាបឆេះរោងចក្រកែច្នៃធ្យូងថ្ម Neryungri ស្ថិតនៅតំបន់ភាគឦសានប្រទេសរុស្ស៊ី ។

ក្រុមហ៊ុនរ៉ែរុស្ស៊ី Mechel MTLR.MM និយាយនៅក្នុងសេចក្តីថ្លែងការណ៍ថា កម្មករត្រូវបានជម្លៀសចេញពីរោងចក្រកែច្នៃធ្យូងថ្មនេះដែលស្ថិតនៅទីក្រុង Neryungriនៃសាធារណរដ្ឋ Yakutia ក្រោយភ្លើងមេតាន ចាប់ផ្តើមឆាបឆេះនៅឃ្លាំងស្តុកទំនិញ ។

នៅក្នុងសេចក្តីថ្លែងការណ៍បង្ហោះលើបណ្តាញព័ត៌មាសង្គម Telegram ក្រសួងសង្រ្គោះបន្ទាន់សាធារណរដ្ឋ Yakutia និយាយថា អគ្គិភ័យនេះត្រូវបានពន្លត់ជាស្ថាពរ ក្រោយបណ្តាលឲ្យខូចខាតឃ្លាំង អគារ និងខ្សែពាន ។

 យោងតាមសារព័ត៌មានរុស្ស៊ី បានឲ្យដឹងថា រោងចក្រ Neryungri ដែលបានចាប់ផ្តើមប្រតិបត្តិការនៅឆ្នាំ ១៩៨៤ មានសមត្ថភាពកែច្នៃធ្យូងថ្មប្រចាំឆ្នាំចំនួន ៩លានតោន ។

 លោក Denis Gerasimenko គឺជានាយរងក្រុមជួយសង្រ្គោះ និងពន្លត់អគ្គិភ័យក្រុង Neryungri និយាយថា ក្រុមភ្នាក់ងារពន្លត់អគ្គិភ័យជាង ៥០នាក់ និងរថយន្តពន្លត់អគ្គិភ័យ ១២គ្រឿង បានចូលរួមប្រតិបត្តិការពន្លត់ភ្លើង ។

 លោកបន្តថា ផលវិបាកក្នុងការពន្លត់អណ្តាតភ្លើង គឺដោយសារការរចនាអគារ និងអណ្តាតភ្លើងឆេះសន្ធោសន្ធៅខ្លាំងពេក ៕