ប្រព័ន្ធផ្សព្វផ្សាយជប៉ុន បានរាយការណ៍ថា បុរសម្នាក់ត្រូវបានចាប់ឃុំខ្លួន នៅទីក្រុងតូក្យូ បន្ទាប់ពីមានការចោទប្រកាន់ថា បានវាយប្រហារដោយកាំបិតលើប្រព័ន្ធរថភ្លើងក្រោមដី នៅថ្ងៃពុធ (ទី៧ ខែឧសភា) ដែលហេតុការណ៍នោះបានបណ្ដាលឲ្យមនុស្សជាច្រើននាក់រងរបួស។

បើយោងតាមប្រព័ន្ធផ្សព្វផ្សាយសាធារណៈ NHK និងបណ្ដាញសារព័ត៌មានក្នុងស្រុកផ្សេងទៀត បានឲ្យដឹងថា ខ្សែរថភ្លើង Tokyo-Metro Namboku Line ត្រូវបានផ្អាកបន្ទាប់ពីមានឧប្បត្តិហេតុនេះ។

នគរបាលមិនទាន់អាចបញ្ជាក់ពីហេតុការណ៍នេះបានភ្លាមៗនៅឡើយទេ ពេលសារព័ត៌មាន AFP ទាក់ទងទៅ ដើម្បីសុំការបំភ្លឺ។ ទូរទស្សន៍ NHK បានបន្ថែមថា មនុស្សជាច្រើននាក់ បានរងរបួស តែកម្រិតធ្ងន់ធ្ងរនៃរបួសរបស់ពួកគេ មិនទាន់ដឹងច្បាស់នៅឡើយទេ។

របាយការណ៍ដោយដកស្រង់សម្ដីនគរបាល បានឲ្យដឹងថា មន្រ្តីត្រូវបានផ្ដល់ដំណឹងនៅម៉ោងប្រហែល ៧ល្ងាច (ម៉ោងក្នុងស្រុក) ថា បុរសម្នាក់មានកាន់កាំបិត ត្រូវបានគេឃើញ នៅស្ថានីយ៍ Todai-mae ភាគកណ្តាលទីក្រុងតូក្យូ។

គួរបញ្ជាក់ថា ឧក្រិដ្ឋកម្មហិង្សា គឺកម្រកើតមានណាស់ នៅក្នុងជប៉ុន ជាប្រទេសមួយដែលមានអត្រាឃាតកម្មទាប និងច្បាប់គ្រប់គ្រងកាំភ្លើងយ៉ាងតឹងរ៉ឹងបំផុត។ ប៉ុន្តែម្តងម្កាល មានហេតុការណ៍ការចាក់ និងសូម្បីតែបាញ់ប្រហារ ក្នុងនោះរួមទាំងការធ្វើឃាតលើអតីតនាយករដ្ឋមន្ត្រី លោក Shinzo Abe ក្នុងឆ្នាំ២០២២ ផងដែរ៕