បទឈប់បាញ់រយៈពេល ៣ថ្ងៃដែលប្រកាសដោយរុស្ស៊ី បានចូលជាធរមាននៅព្រឹកថ្ងៃព្រហស្បតិ៍ (០៨ ឧសភា) នេះ ជាមួយនឹងផ្ទៃមេឃលើទីក្រុងធំៗរបស់អ៊ុយក្រែន ស្ថិតក្នុងភាពស្ងប់ស្ងាត់ ដោយនេះការផ្លាស់ប្តូរយ៉ាងខ្លាំងពីស្ថានភាពដែលធ្លាប់តែមានការវាយប្រហារខ្លាំងក្លាជាបន្តបន្ទាប់ដោយយានដ្រូន និងមីស៊ីលបាលីស្ទិករបស់រុស្ស៊ី។

កងកម្លាំងអាកាសរបស់អ៊ុយក្រែន បានរាយការណ៍ថា បន្ទាប់ពីការចាប់ផ្តើមបទឈប់បាញ់ ដែលគាំទ្រដោយវិមានក្រឹមឡាំងមក យន្តហោះរុស្ស៊ី បានទម្លាក់គ្រាប់បែកប្រើប្រព័ន្ធទូរបញ្ជាចំនួនពីរលើកលើតំបន់ Sumy ភាគខាងជើងអ៊ុយក្រែន។ មិនមានរបាយការណ៍ណាមួយស្តីពីការខូចខាតទេ ហើយសារព័ត៌មានក៏មិនអាចផ្ទៀងផ្ទាត់ដោយឯករាជ្យនូវការវាយប្រហារនេះដែរ។

គិតត្រឹមម៉ោង ៣:៤៥ទៀបភ្លឺថ្ងៃព្រហស្បតិ៍ (ម៉ោងក្នុងស្រុក) រដ្ឋធានីគីវ មានសភាពស្ងប់ស្ងាត់ ផ្ទុយពី ២៤ម៉ោងមុននោះ នៅពេលដែលទីក្រុងនេះពោរពេញដោយសំឡេងនៃការផ្ទុះដ៏ធំពីរលកនៃការវាយប្រហារតាមអាកាសរបស់រុស្ស៊ី និងការបាញ់ប្រឆាំងយានដ្រូន។ ភ្លាមៗនេះ គេមិនទាន់ដឹងច្បាស់ទេថា តើមានការផ្អាកការប្រយុទ្ធនៅជួរមុខ រវាងកងកម្លាំងរុស្ស៊ី និងអ៊ុយក្រែន ឬយ៉ាងណាឡើយ។

បទឈប់បាញ់របស់រុស្ស៊ី ដែលស្របនឹងខួបលើកទី៨០ នៃទិវាជ័យជម្នះសង្រ្គាមលោកលើកទីពីររបស់សហភាពសូវៀតលើពួកណាហ្ស៊ីអាល្លឺម៉ង់ បានចូលជាធរមាននៅពាក់កណ្តាលអធ្រាត្រចូលថ្ងៃព្រហស្បតិ៍នេះ ម៉ោងនៅក្រុងមូស្គូ។ អ៊ុយក្រែន មិនបានប្ដេជ្ញាគោរពបទឈប់បាញ់របស់វិមានក្រឹមឡាំងនេះទេ ដោយរិះគន់ថានេះជាការប្រើល្បិចរបស់លោកប្រធានាធិបតីរុស្ស៊ី Vladimir Putin ដើម្បីបង្កើតចំណាប់អារម្មណ៍ថាលោកចង់បញ្ចប់សង្រ្គាម ប៉ុន្តែលោក Putin និយាយថា លោកប្ដេជ្ញាចិត្តសម្រេចឱ្យបាននូវសន្តិភាព៕