ប្រធានាធិបតីបណ្តោះអាសន្នរបស់ស៊ីរីលោក Ahmed al-Sharaa និយាយថា រដ្ឋាភិបាលរបស់លោកបានចូលរួមក្នុងកិច្ចចរចាដោយប្រយោលជាមួយអ៊ីស្រាអែល ក្នុងការប៉ុនប៉ងបន្ធូរបន្ថយភាពតានតឹងរវាងប្រទេសទាំងពីរ។ 

ការប្រកាសនេះធ្វើឡើងបន្ទាប់ពីមានការកើនឡើងការវាយប្រហាររបស់អ៊ីស្រាអែលលើប្រទេសស៊ីរីកាលពីសប្តាហ៍មុន រួមទាំងការវាយប្រហារដែលបានកើតឡើងចម្ងាយត្រឹមតែ៥០០ម៉ែត្រប៉ុណ្ណោះ ពីវិមានប្រធានាធិបតីក្នុងទីក្រុងដាម៉ាស់(Damascus)កាលពីថ្ងៃសុក្រសប្ដាហ៍មុន។

អ៊ីស្រាអែលបានអះអាងថា ការវាយប្រហារតាមអាកាសថ្មីៗបំផុតរបស់ខ្លួនគឺជាការឆ្លើយតបទៅនឹងអ្វីដែលខ្លួនហៅថាជាការគំរាមកំហែងដល់សហគមន៍ ជនជាតិភាគតិច Druze របស់ប្រទេសនេះ ។ 

លោក al-Sharaa បាននិយាយដោយបន្ទោសអ៊ីស្រាអែលជាថ្មីលើអ្វីដែលរូបលោកបានពិពណ៌នាថាជាអន្តរាគមន៍ចៃដន្យនៅក្នុងប្រទេសស៊ីរីថា មានការពិភាក្សាដោយប្រយោលជាមួយអ៊ីស្រាអែល តាមរយៈក្រុមអ្នកសម្របសម្រួលដើម្បីរក្សាភាពស្ងប់ស្ងាត់ និងព្យាយាមបន្ធូរបន្ថយស្ថានភាព ដើម្បីកុំឱ្យឈានដល់កម្រិតមួយដែលភាគីទាំងពីរបាត់បង់ការគ្រប់គ្រង។

លោកក៏បាននិយាយផងដែរថាក្រុងដាម៉ាស់ កំពុងនិយាយទៅកាន់បណ្ដារដ្ឋដែលទាក់ទងជាមួយអ៊ីស្រាអែលដើម្បីដាក់សម្ពាធពួកគេឱ្យបញ្ឈប់ការធ្វើអន្តរាគមន៍ក្នុងកិច្ចការស៊ីរី និងទម្លាក់គ្រាប់បែកលើហេដ្ឋារចនាសម្ព័ន្ធរបស់ស៊ីរីទៀត។

ពុំមានការអត្ថាធិប្បាយភ្លាមៗពីអាជ្ញាធរអ៊ីស្រាអែលទេ ជុំវិញបញ្ហានេះ៕