ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និង​ជា​ប្រធាន​ក្រុម​ការងារ​រាជរដ្ឋាភិបាលចុះមូលដ្ឋានខេត្តបន្ទាយមានជ័យ អមដោយឯកឧត្តម ប្លែក វ៉ារី ប្រធាន​ក្រុម​ប្រឹក្សា​ខេត្ត និងឯកឧត្តម អ៊ុ រាត្រី អភិបាលខេត្ត និងជាប្រធាន​គណៈកម្មាធិការ​សាខា​កាក​បាទ​ក្រហម​កម្ពុជាខេត្តបន្ទាយមានជ័យ បានអញ្ជើញចូលរួមពិធីប្រារព្ធខួបលើកទី១៦២ អបអរ​ទិវា​ពិភព​លោក​កាកបាទក្រហម អឌ្ឍចន្ទក្រហម ៨ ឧសភា ២០២៥ ក្រោមប្រធានបទ «រួមគ្នា​ជា​មួយ​កាក​បាទ​ក្រហមកម្ពុជា ដើម្បីសហគមន៍មានសុខភាពល្អ និងមានភាពធន់​នឹង​អាកាស​ធាតុ​»​។​

នៅក្នុងអង្គពិធី កាលពីព្រឹកថ្ងៃទី៨ ខែឧសភានេះ ឯកឧត្តមរដ្ឋមន្ត្រី បានសម្តែង​ក្តី​សោមនស្ស​រីករាយ និងថ្លែងអំណរគុណដឹងគុណដល់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធាន​កាក​បាទ​ក្រហមកម្ពុជា ដែលបានតែងតាំង ឯកឧត្តមរដ្ឋមន្ត្រី ឌិត ទីណា ជាប្រធាន​កិត្តិយស​សាខា​កាក​បាទ​ក្រហម​កម្ពុជា ខេត្តបន្ទាយមានជ័យ។ ឯកឧត្តម បង្ហាញគោលជំហរប្តេជ្ញា​បន្ត​ជំរុញ​ចលនា​គាំទ្រ​ឱ្យ​មានភាពសកម្មបន្ថែមទៀតនូវការងារមនុស្សធម៌ជួយបងប្អូនដែលជួបទុក្ខលំបាក ប្រកប​ដោយប្រសិទ្ធភាព។

ក្នុងឱកាសដ៏វិសេសវិសាលនេះ ឯកឧត្តមរដ្ឋមន្ត្រី បានសម្តែងនូវការកោតសរសើរ និងវាយ​តម្លៃ​ខ្ពស់​ចំពោះ​ភាពសកម្ម និងលទ្ធផលការងារ ដែលគណៈកម្មាធិការសាខាកាកបាទក្រហមកម្ពុជា ខេត្ត​បន្ទាយមានជ័យសម្រេចបាននាពេលកន្លងមក ក្នុងការ​ជួយ​ដល់​ប្រជា​ពលរដ្ឋ​រង​គ្រោះ​ដោយ​គ្រោះ​មហន្តរាយផ្សេងៗ ដូចជា គ្រោះទឹកជំនន់ រាំងស្ងួត ខ្យល់កន្ត្រាក់ ភ្លើងឆេះនិង​បញ្ហា​ប្រឈម​ផ្សេង​ៗ​ទៀត​។

បើតាមឯកឧត្តមរដ្ឋមន្ដ្រី កាកបាទក្រហមកម្ពុជានឹងមិនទុកនរណាម្នាក់ចោលឡើយ និង​បាន​ដាក់​ពង្រាយ​ដល់​គ្រប់ភូមិ-ឃុំទូទាំងខេត្ត ដែលជាសរសៃឈាម ភ្នែភ ស្តែង​ចេញ​ជា​សកម្មភា​ព​ជួយ​ប្រជា​ពលរដ្ឋ​បានទាន់ពេលវេលា។

ជាទីបញ្ចប់ ឯកឧត្តមរដ្ឋមន្រ្តី បានថ្លែងអំណរគុណនូវទឹកចិត្តដ៏ល្អប្រពៃដល់សមាជិក សមាជិកា សប្បុរស​ជនទាំងអស់ដែលបានចូលរួមយ៉ាងច្រើនអនេក និងបាន​អំពាវ​នាវ​ឱ្យ​បន្ត​ជួយ​គាំទ្រ​តទៅ​មុខ​បន្ថែម​ទៀត​តាមលទ្ធភាព និងទឹកចិត្ត សំដៅជួយដល់ជនរងគ្រោះ និងជនងាយរង​គ្រោះ​ប្រកប​ដោយ​បរិយាបន្ន និងជូនពរដល់អង្គពិធីទទួលបានជោគជ័យ សុខសុភមង្គល​ក្រោម​ម្លប់​សុខ​សន្តិភាព​៕