សមាគមក្លឹបទេសចរណ៍សៀមរាប និងក្រសួងទេសចរណ៍ បានការគាំទ្រសហហិរញ្ញប្បទានពីមូលនីធិអភិវឌ្ឍន៍ជំនាញ និងការអនុញ្ញាតឱ្យប្រើប្រាស់កម្មវិធីបណ្តុះបណ្តាលបដិសណ្ឋារកិច្ចហូកានៃគម្រោងអភិវឌ្ឍជំនាញ បានរៀបចំបើកវគ្គបណ្តុះបណ្តាលផ្នែកបដិសណ្ឋារកិច្ចវគ្គទី៣ដល់សិក្ខាកាមចំនួន២០០នាក់ មានរយៈពេល៨ខែ ចាប់ផ្តើមពីថ្ងៃទី០១ ខែមេសា ឆ្នាំ២០២៥ ដល់ ថ្ងៃទី៣០ ខែវិច្ឆិកា ឆ្នាំ២០២៥ ផ្តោតលើជំនាញ៤រួមមាន៖ទី១) ការិយាល័យជួរមុខ ទី២) សេវាកម្មម្ហូបអាហារនិងភេសជ្ជៈ ទី៣) គេហកិច្ច និងទី៤) ផ្នែកចុងភៅ។

ក្នុងគោលបំណងចម្បង ដើម្បីលើកកម្ពស់ឱ្យយុវជនដែលបោះបង់ការសិក្សាងាកមក សិក្សាជំនាញ បដិសណ្ឋារកិច្ចរយៈពេលខ្លី ចំណេញពេលវេលា និងទទួលបានបំណិនជីវិតស្រប តាមគោល នយោបាយ របស់រដ្ឋាភិបាលគឺ “មនុស្សម្នាក់ ជំនាញមួយ។

ពិធីបើកប្រព្រឹត្តទៅ នារសៀលថ្ងៃទី០៨ ខែឧសភាឆ្នាំ២០២៥នៅសណ្ឋាគារមេម័រផាលេសក្រុងសៀមរាប ក្រោមអធិបតីភាព ឯកឧត្តម ប៉ាក់ សុខុម រដ្ឋលេខាធិការក្រសួងទេសចរណ៍ និងលោក ង៉ូវ សេងកាក់ អភិបាលរងខេត្តសៀមរាបព្រមទាំងវត្តមានលោកលោកស្រីអង្គភាពមន្ទីរស្ថាប័នពាក់ព័ន្ធជាច្រើនទៀតផងដែរ៕