យោងតាមការអះអាងរបស់អ្នកនាំពាក្យរដ្ឋាភិបាលជប៉ុនលោក Yoshimasa Hayashi បានឲ្យដឹងថា ជប៉ុនសូមធ្វើការថ្កោលទោសយ៉ាងខ្លាំងក្លាចំពោះកូរ៉េខាងជើង ក្រោយប្រទេសមួយនេះ បាញ់មីស៊ីលបាលីស្ទិកនៅថ្ងៃព្រហស្បតិ៍នេះ ដែលអាចហោះលើគន្លងខុសប្រក្រតី ។

លោកថា កូរ៉េខាងជើង បានបាញ់មីស៊ីលបាលីស្ទិកជាច្រើនគ្រាប់ចេញពីតំបន់ឆ្នេរភាគខាងកើតកូរ៉េខាងជើង ឆ្ពោះទៅទិសឦសាន ចន្លោះម៉ោង ៨ និងម៉ោង ៩ព្រឹក ម៉ោងក្នុងស្រុក ថ្ងៃនេះ ។

លោក Hayashi និយាយប្រាប់ក្រុមអ្នកសារព័ត៌មានថា មីស៊ីល ១គ្រាប់ហោះបានចម្ងាយប្រហែល ៨០០គ.ម លើរយៈកម្ពស់អតិបរមា ១០០គ.ម ហើយនិងធ្លាក់ចូលសមុទ្រជប៉ុន ស្ថិតនៅភាគខាងកើតឧបទ្វីបកូរ៉េ នៅក្រៅតំបន់សេដ្ឋកិច្ចផ្តាច់មុខជប៉ុន ។ លោកបន្តថា ជប៉ុនបានដាក់ការតវ៉ាតាមផ្លូវការទូតនៅទីក្រុងប៉េកាំង ប្រទេសចិន ។

ខណៈពេលនោះដែរ កូរ៉េខាងត្បូងកំពុងទំនាក់ទំនងយ៉ាងជិតស្និទ្ធជាមួយសហរដ្ឋអាមេរិក និងជប៉ុន ដើម្បីចែករំលែកព័ត៌មានអំពីការបាញ់សាកល្បងមីស៊ីលនេះ ។ 

សូមបញ្ជាក់ថា កម្មវិធីមីស៊ីលបាលីស្ទិករបស់ប្រទេសប្រដាប់អាវុធនុយក្លេអ៊ែរមួយនេះ ត្រូវបានហាមឃាត់ដោយសេចក្តីសម្រេចក្រុមប្រឹក្សាសន្តិសុខអង្គការសហប្រជាជាតិ(UN) ប៉ុន្តែក្នុងរយៈពេលប៉ុន្មានឆ្នាំកន្លងមកនេះ ទីក្រុងព្យុងយ៉ាង នៅតែបន្តអភិវឌ្ឍមីស៊ីលគ្រប់រយៈចម្ងាយទាំងអស់ ៕