នាយករដ្ឋមន្រ្តីស្លូវ៉ាគី កំពុងស្វែងរកផ្លូវធ្វើដំណើរទៅកាន់ទីក្រុងមូស្គូ នៅថ្ងៃព្រហស្បតិ៍ (ទី៨ ខែមេសា) នេះ ដើម្បីចូលរួមក្នុងព្រឹត្តិការណ៍ព្យុហយាត្រាជ័យជម្នះសម័យសង្គ្រាមលោកលើកទី២ របស់រុស្ស៊ី បន្ទាប់ពីប្រទេសលីទុយអានី បានបិទដែនអាកាសរបស់ខ្លួនមិនឲ្យយន្តហោះដឹករូបលោកហោះហើរឆ្លងកាត់ ហើយលោកបាននិយាយថា ប្រទេសបាល់ទិកផ្សេងទៀត បានដាក់ការរឹតបន្តឹងស្រដៀងគ្នានេះ។

លោក Robert Fico ដែលបានជួបជាមួយប្រធានាធិបតីរុស្ស៊ី លោក Vladimir Putin នៅវិមានក្រឹមឡាំង កាលពីខែធ្នូឆ្នាំមុន គឺជាមេដឹកនាំសហភាពអឺរ៉ុបតែម្នាក់ប៉ុណ្ណោះ ដែលគ្រោងចូលរួមការប្រារព្ធពិធីថ្ងៃទី៩ ខែឧសភា នៅទីក្រុងមូស្គូ ដែលនឹងមានវត្តមានឥស្សរជនបរទេសជាង ២០រូបផ្សេងទៀត ក្នុងនោះរួមមានទាំងប្រធានាធិបតីចិន លោក ស៊ី ជីនពីង (Xi Jinping) ផងដែរ។

ប្រធានាធិបតីលីទុយអានី លោក Gitanas Nauseda បាននិយាយកាលពីថ្ងៃពុធថា ប្រទេសរបស់លោកបានបិទដែនអាកាសរបស់ខ្លួន មិនឲ្យមានការហោះឆ្លងកាត់ សម្រាប់យន្តហោះដឹកលោក Fico និងប្រធានាធិបតីស៊ែប៊ី លោក Aleksandar Vucic ទៅកាន់ទីក្រុងមូស្គូ។

យន្តហោះដែលធ្វើដំណើរ រវាងរុស្ស៊ី និងអឺរ៉ុប ជាធម្មតាបានប្រើប្រាស់ដែនអាកាសលីទុយអានី ចាប់តាំងពីក្រុមហ៊ុនអាកាសចរណ៍អឺរ៉ុប ត្រូវបានគេប្រាប់នៅឆ្នាំ២០២១ ថា ឲ្យជៀសវាងហោះហើរលើផ្លូវចម្ងាយជិតជាងនេះរបស់ប្រទេសបេឡារុស ដែលជាផ្នែកនៃវិធានការដាក់ទណ្ឌកម្មប្រឆាំងនឹងទីក្រុង Minsk ពោលគឺជាឆ្លើយតបទៅនឹងការពង្រាយយន្តហោះចម្បាំង ដើម្បីបង្ខំឲ្យយន្តហោះ Ryanair ចុះចត។

ចំណែកដែនអាកាសអ៊ុយក្រែន ដែលជាផ្លូវចម្ងាយជិតមួយផ្សេងទៀត ត្រូវបានបិទតាំងពីឆ្នាំ២០២២ ដោយសារការលុកលុយរបស់រុស្ស៊ី។ រីឯក្រសួងការបរទេសរបស់ប្រទេសឡាតវី បានឲ្យដឹងថា ខ្លួននឹងមិនអនុញ្ញាតឲ្យមានការហោះហើរណាមួយទៅចូលរួមព្រឹត្តិការណ៍ព្យុហយាត្រានេះនោះទេ ប៉ុន្តែមិនបានលើកឡើងជាពិសេសសំដៅទៅលើមេដឹកនាំស្លូវ៉ាគីនោះឡើយ ខណៈដែលមន្ត្រីនៅក្នុងប្រទេសអេស្តូនី ដែលមិនមានផ្លូវហោះហើរជាក់ស្តែងទៅកាន់ទីក្រុងមូស្គូនោះ បានប្រាប់ថា ខ្លួនមិនត្រូវបានគេស្នើសុំឲ្យមានការហោះហើរនោះទេ៕