លោកប្រធានាធិបតីចិនលោក Xi Jinping បានប្រាប់មេដឹកនាំរុស្ស៊ីលោក Vladimir Putin កាលពីថ្ងៃព្រហស្បតិ៍សប្ដាហ៍នេះថា ប្រទេសទាំងពីរគួរតែជា"មិត្តដែកថែប" ខណៈមេដឹកនាំទាំងពីរបានសន្យាបង្កើនកិច្ចសហប្រតិបត្តិការដល់កម្រិតថ្មីមួយ និងម៉ឺងម៉ាត់ ប្រឆាំងនឹងឥទ្ធិពលរបស់សហរដ្ឋអាមេរិក និងលោកខាងលិច។

នៅឯកិច្ចពិភាក្សានៅវិមានក្រឹមឡាំង មេដឹកនាំទាំងពីរបានតាំងខ្លួនជាអ្នកការពារសណ្តាប់ធ្នាប់ពិភពលោកថ្មី លែងត្រូវបានគ្រប់គ្រងដោយសហរដ្ឋអាមេរិកទៀតហើយ។  

នៅក្នុងសេចក្តីថ្លែងការណ៍រួមដ៏វែងមួយ មេដឹកនាំមហាអំណាចទាំងពីរបាននិយាយថា លោកទាំងពីរនឹងធ្វើឱ្យទំនាក់ទំនងកាន់តែស៊ីជម្រៅលើគ្រប់វិស័យ រួមទាំងទំនាក់ទំនងយោធា និងពង្រឹងការសម្របសម្រួល ដើម្បីប្រឆាំងដាច់ខាតចំពោះផ្លូវរបស់ទីក្រុងវ៉ាស៊ីនតោនក្នុងការទប់ស្កាត់ការរីកចម្រើនរបស់ប្រទេសរុស្ស៊ី និងចិន។   

ប្រទេសទាំងពីរបាននិយាយថា ជម្លោះអ៊ុយក្រែនអាចដោះស្រាយបាន ដោយគ្រាន់តែជម្រះចេញ"ប្រភពដើមហេតុ" របស់វា ជាឃ្លាដែលរុស្ស៊ីបានប្រើជាញឹកញាប់នៅពេលប្រកែកថាខ្លួនត្រូវបង្ខំឱ្យធ្វើសង្រ្គាមដើម្បីទប់ស្កាត់ការរំពឹងទុករបស់អ៊ុយក្រែនចូលរួមជាសមាជិកភាពសម្ព័ន្ធយោធាណាតូ។ អ៊ុយក្រែន និងសម្ព័ន្ធមិត្តលោកខាងលិចនិយាយថា នោះជាលេសមិនពិតសម្រាប់អ្វីដែលគេហៅថាការឈ្លានពានតាមបែបអធិរាជ។

សេចក្តីថ្លែងការណ៍រួមក៏បាននិយាយផងដែរថា រុស្ស៊ី និងចិន មានបំណងដើរតួនាទីយ៉ាងសកម្មក្នុងការដោះស្រាយបញ្ហាជុំវិញកម្មវិធីនុយក្លេអ៊ែររបស់អ៊ីរ៉ង់៕