ប្រធានាធិបតីសហរដ្ឋអាមេរិក លោក Donald Trump និងនាយករដ្ឋមន្ត្រីអង់គ្លេស លោក Keir Starmer កាលពីថ្ងៃព្រហស្បតិ៍ (០៨ ឧសភា) បានប្រកាសពីកិច្ចព្រមព្រៀងពាណិជ្ជកម្មទ្វេភាគីមានកម្រិតថ្មីមួយ ដែលនៅតែរក្សាទុកពន្ធមូលដ្ឋាន ១០% របស់លោក Trump លើការនាំចេញរបស់អង់គ្លេស ដោយពង្រីកការចូលប្រើប្រាស់កសិកម្មតិចតួចប៉ុណ្ណោះសម្រាប់ប្រទេសទាំងពីរ និងកាត់បន្ថយពន្ធហាមឃាត់របស់សហរដ្ឋអាមេរិក លើការនាំចេញរថយន្តរបស់អង់គ្លេស។

កិច្ចព្រមព្រៀង "លក្ខខណ្ឌទូទៅ" មួយនេះគឺជាកិច្ចព្រមព្រៀងដំបូងនៃការបញ្ចុះតម្លៃពន្ធជាច្រើន ដែលលោក Trump រំពឹងថានឹងធ្វើឡើងនៅប៉ុន្មានសប្តាហ៍ខាងមុខ បន្ទាប់ពីការកែប្រែប្រព័ន្ធពាណិជ្ជកម្មសកលជាមួយនឹងពន្ធនាំចូលថ្មីៗដ៏ខ្ពស់របស់លោក ក្នុងបំណងកាត់បន្ថយឱនភាពពាណិជ្ជកម្មទំនិញរបស់អាមេរិកចំនួន ១,២សែនកោដិដុល្លារ។

លោក Trump បានសាទរកិច្ចព្រមព្រៀងនេះនៅក្នុងការិយាល័យ Oval Office ជាមួយនឹងលោក Starmer តាមកិច្ចសន្ទនាទូរសព្ទ ខណៈមេដឹកនាំទាំងពីរបានហៅផែនការនេះថាជា "កិច្ចព្រមព្រៀងទម្លាយភាពជាប់គាំង" ដែលកាត់បន្ថយពន្ធជាមធ្យមរបស់អង់គ្លេស លើទំនិញអាមេរិក មកត្រឹម ១,៨ ពីតួលេខ ៥,១% ពីមុន ប៉ុន្តែនៅរក្សាការយកពន្ធ ១០% របស់អាមេរិក លើទំនិញអង់គ្លេស។

រហូតមកដល់ពេលនេះ ការនាំចូលភាគច្រើនពីចក្រភពអង់គ្លេស ទៅអាមេរិក បានប្រឈមពន្ធ ១០% ហើយអង់គ្លេស ក៏ដូចជាប្រទេសដទៃទៀតដែរ គឺបានរងពន្ធ ២៥% លើការនាំចេញដែកថែប និងអាលុយមីញ៉ូមទៅអាមេរិក ព្រមទាំងពន្ធ ២៥% ផ្សេងទៀតលើរថយន្ត និងគ្រឿងបន្លាស់រថយន្ត។ នៅក្រោមកិច្ចព្រមព្រៀងថ្មីនេះ ពន្ធរបស់អាមេរិកលើទំនិញរបស់អង់គ្លេស នឹងត្រូវបានកំណត់ឱ្យនៅ ១០% ដដែល ខណៈពន្ធលើដែកថែប និងអាលុយមីញ៉ូមរបស់អង់គ្លេសទៅកាន់អាមេរិក នឹងត្រូវកាត់បន្ថយមកស្មើសូន្យ។

ក្រុមធុរកិច្ចអង់គ្លេស-អាមេរិក បានសម្តែងការខកចិត្តដែលកិច្ចព្រមព្រៀងនេះនៅតែទុកពន្ធ ១០% របស់លោក Trump សម្រាប់ផលិតផលជាច្រើន រួមទាំងរថយន្ត ដែលជាការបង្កើនថ្លៃដើមសម្រាប់អ្នកនាំចេញចក្រភពអង់គ្លេស៕