បណ្ដាមេដឹកនាំអន្តរជាតិ និងអ្នកគោរពសាសនារ៉ូម៉ាំងកាតូលិកនៅទូទាំងពិភពលោក បានសម្ដែងការអបអរសាទរ បន្ទាប់ពីសង្ឃនាយកកាតូលិក ព្រះនាម Robert Prevost ដែលជាសាសនទូតយូរមកហើយនៅអាមេរិកឡាទីន ត្រូវបានជ្រើសរើសយ៉ាងគួរឱ្យភ្ញាក់ផ្អើលឱ្យធ្វើជាប្រមុខដឹកនាំថ្មីនៃព្រះវិហារកាតូលិក បុរីវ៉ាទីកង់ កាលពីថ្ងៃព្រហស្បតិ៍ (០៨ ឧសភា) សប្ដាហ៍នេះ ដោយបានក្លាយជាសម្តេចប៉ាបមកពីសហរដ្ឋអាមេរិកដំបូងគេ ហើយដាក់ព្រះនាមថា សម្ដេចប៉ាប លីអូ ទី១៤ (Leo XIV)។

សម្ដេចប៉ាប លីអូ បានបង្ហាញព្រះភ័ក្រ្តលើរានហាលកណ្តាលនៃព្រះវិហារ St. Peter's បន្ទាប់ពីផ្សែងពណ៌សបានហុយចេញពីបំពង់ផ្សែងនៅលើវិហារ Sistine Chapel ដែលបញ្ជាក់ថា មន្រ្តីសង្ឈកាតូលិកបោះឆ្នោតទាំង ១៣៣អង្គ បានជ្រើសរើសទ្រង់ជាអ្នកស្នងតំណែងរបស់សម្ដេចប៉ាប ហ្រ្វង់ស៊ីស ដែលបានសោយទិវង្គត់កាលពីខែមុន។

ទ្រង់បានមានបន្ទូលទៅកាន់ហ្វូងអ្នកគាំទ្រ ជាភាសាអ៊ីតាលីយ៉ាងស្ទាត់ជំនាញថា "សន្តិភាពនៅជាមួយអ្នកទាំងអស់គ្នា" រួចទ្រង់ក៏មានបន្ទូលជាភាសាអេស្ប៉ាញខ្លីៗ ប៉ុន្តែព្រះអង្គមិនមានបន្ទូលអ្វីជាភាសាអង់គ្លេសឡើយ។ សម្ដេចប៉ាបអង្គថ្មីនេះព្រះជន្ម ៦៩ព្រះវស្សា និងមានដើមកំណើតនៅក្រុង Chicago របស់អាមេរិក ហើយចំណាយពេលភាគច្រើនជាសាសនទូតនៅប៉េរូ និងមានសញ្ជាតិពីរប៉េរូ-អាមេរិក។

មេដឹកនាំជាច្រើន និងសាសនិកកាតូលិកមកពីជុំវិញពិភពលោក រួមទាំងប៉េរ៉ូ ហ្វីលីពីន បារាំង ចក្រភពអង់គ្លេស អ៊ីតាលី ក្រិក រុស្ស៊ី បារាំង និងជាច្រើនផ្សេងទៀត ជាពិសេសនៅសហរដ្ឋអាមេរិក បានត្រេកអរដែលបុរីវ៉ាទីកង់ មានប្រមុខដឹកនាំថ្មី ដោយលោកប្រធានាធិបតីអាមេរិក Donald Trump បានបានចេញសារអបអរសាទរភ្លាមៗ៕