ក្រុមអ្នកជំនាញរបស់អង្គការសហប្រជាជាតិ បានទាមទារឱ្យមានសកម្មភាពបន្ទាន់ដើម្បីទប់ស្កាត់ "ការបំផ្លិចបំផ្លាញទាំងស្រុងដ៏មហន្តរាយ" នៃជនជាតិប៉ាឡេស្ទីននៅក្នុងតំបន់ហ្កាហ្សា បន្ទាប់ពីក្រុមជួយសង្គ្រោះបាននិយាយថា ការវាយប្រហាររបស់អ៊ីស្រាអែលនៅទូទាំងទឹកដីនេះ បានបន្តសម្លាប់មនុស្សរាប់សិបនាក់។

ផែនការពង្រីកប្រតិបត្តិការសឹក ដែលបង្ហាញដោយយោធាអ៊ីស្រាអែល បានទាក់ទាញការថ្កោលទោសជាអន្តរជាតិ បន្ទាប់ពីទីភ្នាក់ងារអង្គការសហប្រជាជាតិ កាលពីមុនបានព្រមានពីមហន្តរាយមនុស្សធម៌ម្ដងហើយម្ដងទៀតនៅក្នុងទឹកដីប៉ាឡេស្ទីន ដែលរងការបំផ្លិចបំផ្លាញដោយសង្រ្គាមរយៈពេល ១៩ខែមួយនេះ។

អ្នកជំនាញឯករាជ្យជាង ២០នាក់ ដែលត្រូវតែងតាំងដោយក្រុមប្រឹក្សាសិទ្ធិមនុស្សអង្គការសហប្រជាជាតិ បានព្រមានកាលពីថ្ងៃពុធ (០៧ ឧសភា) សប្ដាហ៍នេះថា ពិភពលោកប្រឈមនឹង "ការសម្រេចចិត្តយ៉ាងម៉ឺងម៉ាត់ និងដាច់ណាត់បំផុត" ទៅលើថា "តើត្រូវបន្តភាពអសកម្ម និងឈរមើលការកាប់សម្លាប់មនុស្សស្លូតត្រង់ ឬក៏ចូលរួមក្នុងការបង្កើតដំណោះស្រាយដ៏យុត្តិធម៌សម្រាប់ហ្កាហ្សា"។ អ្នកជំនាញទាំងនោះក៏អង្វរកដល់សហគមន៍អន្តរជាតិ ឱ្យជៀសវាងពី "ការព្រងើយកន្ដើយនឹងសីលធម៌ ដែលកំពុងធ្លាក់ចុះ"។

អាជ្ញាធរសុខាភិបាលមានមូលដ្ឋាននៅហ្កាហ្សា បាននិយាយនៅរសៀលថ្ងៃពុធសប្ដាហ៍នេះថា ចំនួនអ្នកស្លាប់សរុបរបស់ប៉ាឡេស្ទីន ពីការវាយប្រហាររបស់អ៊ីស្រាអែល នៅតំបន់ហ្កាហ្សា បានបន្តកើនឡើងដល់ជាង ៥២.៦០០នាក់ និងប្រមាណ ១១៨.៩០០នាក់ផ្សេងទៀតរងរបួស ចាប់តាំងពីជម្លោះចុងក្រោយបំផុតរវាងអ៊ីស្រាអែល និងក្រុមហាម៉ាស បានផ្ទុះឡើងនៅដើមខែតុលា ឆ្នាំ២០២៣ មក៕