រុស្សី កំពុងធ្វើការពង្រីករោងចក្រដ៏ធំមួយនៅតំបន់ដាច់ស្រយាលស៊ីបេរី ដើម្បីបង្កើនការផលិតគ្រឿងផ្ទុះដ៏មានកម្លាំងខ្លាំងក្លា ដែលប្រើក្នុងគ្រាប់កាំភ្លើងធំ និងគ្រាប់បែកផ្សេងទៀតក្នុងសង្គ្រាមនៅអ៊ុយក្រែន ខណៈដែលជម្លោះនៅតែបន្តអូសបន្លាយ នេះបើតាមការពិនិត្យឡើងវិញរបស់សារព័ត៌មានរ៉យទ័រ លើឯកសាររដ្ឋដែលមានជាសាធារណៈ និងរូបភាពផ្កាយរណប។

សមត្ថភាពរបស់ទីក្រុងមូស្គូ ក្នុងការអាចប្រមូលផ្តុំគ្រាប់ផ្លោងច្រើនជាងអ៊ុយក្រែន បានដើរតួយ៉ាងសំខាន់នៅក្នុងសមរភូមិជោគជ័យរបស់រុស្ស៊ី អំឡុងពេលជម្លោះ ដែលភាគច្រើនប្រយុទ្ធដោយប្រើកាំភ្លើងធំ និងយានដ្រូន។ ទោះយ៉ាងនេះក្ដី ទីក្រុងមូស្គូ នៅតែត្រូវការនាំចូលគ្រាប់ផ្លោងក្នុងបរិមាណដ៏ច្រើនពីកូរ៉េខាងជើង ហើយឃ្លាំងស្តុកអាវុធរបស់ខ្លួនកំពុងធ្លាក់ចុះ នេះបើយោងតាមសហរដ្ឋអាមេរិក និងអ៊ុយក្រែន។

ក្រុមអ្នកវិភាគវិស័យការពារជាតិបាននិយាយថា គ្រឿងផ្ទុះបន្ថែមដែលរំពឹងទុកពីគម្រោងថ្មីនេះ អាចជួយបង្កើនកម្លាំងភ្លើងរបស់ទីក្រុងមូស្គូយ៉ាងសំខាន់ នៅពេលអ៊ុយក្រែន និងសម្ព័ន្ធមិត្តលោកខាងលិចរបស់ខ្លួន បានកំពុងបង្កើនការផលិតអាវុធ ដែលចាំបាច់ដើម្បីរារាំងការវាយរុលក្នុងសមរភូមិរបស់រុស្ស៊ី។

ព័ត៌មានអំពីរោងចក្រគ្រឿងផ្ទុះនេះ បានកើតឡើងនៅពេលដែលរុស្ស៊ី បាននិងកំពុងវាយលុកអ៊ុយក្រែន ដោយការវាយប្រហារកាំភ្លើងធំ មីស៊ីល និងយានដ្រូន ហើយខណៈដែលលោកប្រធានាធិបតីអាមេរិក Donald Trump ជំរុញឱ្យមានកិច្ចព្រមព្រៀងបញ្ចប់សង្រ្គាម ដែលបានចាប់ផ្តើមជាមួយនឹងប្រតិបត្តិការយោធាទីក្រុងមូស្គូ ក្នុងខែកុម្ភៈ ឆ្នាំ២០២២។

គួរឱ្យដឹងថា ឯកសារបានបង្ហាញថាខ្សែសង្វាក់ផលិតកម្មថ្មីរបស់រុស្ស៊ីនេះ កំពុងត្រូវបានសាងសង់នៅរោងចក្រ ដែលគ្រប់គ្រងដោយក្រុមហ៊ុនការពាររបស់រដ្ឋ ឈ្មោះ Ya. M. Sverdlov ដែលជាក្រុមហ៊ុនផលិតគ្រឿងផ្ទុះថ្នាក់យោធាដ៏ធំរបស់រុស្ស៊ី៕