ភ្នំពេញ៖ កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការនគរបាលបាលខណ្ឌច្បារអំពៅ ស្រាវជ្រាវឃាត់ខ្លួនជនសង្ស័យ ជាមុខសញ្ញាជូញដូរគ្រឿងញៀន ប្រដាប់អាវុធ និងបង្កភាពអសន្តិសុខ ក្នុងមូលដ្ឋានសង្កាត់ច្បារអំពៅទី២ ខណ្ឌច្បារអំពៅ។

ប្រតិបត្តិការនេះ បានធ្វើឡើងនៅវេលាម៉ោង២៣និង២០នាទីយប់ថ្ងៃទី០៨ ខែឧសភា ឆ្នាំ ២០២៥ កម្លាំងជំនាញការិយាល័យប្រឆាំងគ្រឿងញៀន សហការជាមួយកម្លាំងជំនាញអធិការនគរបាលបាលខណ្ឌច្បារអំពៅ បានធ្វើការបង្រ្កាបជាក់ស្ដែងនូវករណីជួញដូរ,រក្សាទុកនិងប្រើប្រាស់ដោយខុសច្បាប់នូវសារធាតុញៀន នៅចំណុចបន្ទប់ជួលគ្មានលេខ ផ្លូវបេតុង ភូមិដើមចាន់ (យឿត្រី) សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ ។

នគរបាល បានឲ្យដឹងថា មុនឈានដល់ការឃាត់ខ្លួជនសង្ស័យឈ្មោះ ប៉េង ដារ៉ា ហៅ អាង៉ោល ភេទប្រុស អាយុ៣៥ឆ្នាំនេះ កម្លាំងនគរបាលជំនាញបានស្រាវជ្រាវកំណត់អត្តសញ្ញាណ ដោយជនសង្ស័យរូបនេះ ជួញដូរ,រក្សាទុកនិងប្រើប្រាស់ដោយខុសច្បាប់នូវសារធាតុញៀន ប្រដាប់ដោយអាវុធផងដែរ។

ក្នុងរង្វង់ប្រតិបត្តិការកម្លាំងនគរបាលបានដកហូតរួមមាន៖ ក្រាមពណ៌សថ្លា សង្ស័យជាគ្រឿងញៀន ចំនួន ៧កញ្ចប់ ,គ្រាប់អាវុធខ្លី ចំនួន ៤៥គ្រាប់ ,ដាវដែក ចំនួន១ និង កាំបិត ចំនួន១, បំពង់កែវសម្រាប់ប្រើប្រាស់គ្រឿងញៀន ចំនួន២, ឧបករណ៍សម្រាប់ប្រើប្រាស់គ្រឿងញៀន ចំនួន១ និងទូរស័ព្ទដៃ ចំនួន២គ្រឿង។

នគរបាលមូលដ្ឋានបញ្ជាក់ថា ជនសង្ស័យរូបនេះ ជាមុខសញ្ញាជួញដូរ ចែកចាយគ្រឿងញៀនយ៉ាងសកម្ម និងជាជនទំនើងអុកឡុកក្នុងមូលដ្ឋាន។ បច្ចុប្បន្នជនសង្ស័យរួមទាំងវត្ថុតាង ត្រូវបានកម្លាំងនគរបាលផែនប្រឆាំងគ្រឿងញៀន នៃអធិការនគរបាលខណ្ឌច្បារអំពៅ ចាត់ការតាមនីតិវិធីច្បាប់ ៕ អត្ថបទ៖ កុម្ភះ