ប្រទេសអង់គ្លេសនឹងដាក់ទណ្ឌកម្មនាវាដឹកប្រេងរហូតដល់ទៅ ១០០គ្រឿង ជាអ្វីដែលគេហៅថា កងនាវាស្រមោលរបស់រុស្ស៊ី ដោយប្រឹងប្រែងបង្កើនសម្ពាធលើទីក្រុងមូស្គូ នៅក្នុងសង្គ្រាមជាមួយអ៊ុយក្រែន ខណៈដែលមេដឹកនាំមកពីសម្ព័ន្ធមិត្តសន្តិសុខរួម (JEF) ជួបប្រជុំគ្នានៅប្រទេសន័រវែស នាថ្ងៃសុក្រ (ទី៩ ខែឧសភា)។

អង់គ្លេសបានឲ្យដឹងថា នាវាទាំងនោះបានដឹកទំនិញដែលមានតម្លៃជាង ២៤ពាន់លានដុល្លារអាមេរិក គិតចាប់តាំងពីដើមឆ្នាំ២០២៤ មក ដោយនាវាមួយចំនួនក៏ពាក់ព័ន្ធនឹងការបំផ្លាញហេដ្ឋារចនាសម្ព័ន្ធសំខាន់ៗផងដែរ។

ការិយាល័យរបស់លោកនាយករដ្ឋមន្ត្រី Keir Starmer បាននិយាយថា ទណ្ឌកម្មនេះនឹងតំណាងឲ្យកញ្ចប់វិធានការដ៏ធំបំផុតរបស់ចក្រភពអង់គ្លេស ប្រឆាំងនឹងកងនាវាស្រមោល។

យ៉ាងណាក្ដី ការិយាល័យនេះមិនបានផ្តល់ព័ត៌មានលម្អិតបន្ថែមនោះឡើយ ប៉ុន្តែការដាក់ទណ្ឌកម្មស្រដៀងគ្នានេះពីមុន បានរឹតបន្តឹង ឬហាមឃាត់ការធ្វើនាវាចរណ៍នៃកងនាវាស្រមោល ក៏ដូចជាការចូលទៅកាន់កំពង់ផែអង់គ្លេសមួយចំនួនផងដែរ។ លោក Starmer នឹងប្រកាសអំពីវិធានការនេះ អំឡុងកិច្ចប្រជុំកំពូលនៃមេដឹកនាំ JEF នៅក្នុងទីក្រុង Oslo។

ដោយត្រូវបានបង្កើតឡើងក្នុងឆ្នាំ២០១៤ ក្រុមដែលដឹកនាំដោយអង់គ្លេសនៃបណ្តាប្រទេសអឺរ៉ុបខាងជើងចំនួន ១០ ក្នុងនោះរួមមានទាំងដាណឺម៉ាក ហូឡង់ ហ្វាំងឡង់ និងស៊ុយអែតផងដែរ ដើរតួជាជំនួយបន្ថែមដល់កិច្ចសហប្រតិបត្តិការកាន់តែទូលំទូលាយ តាមរយៈសម្ព័ន្ធភាពយោធាណាតូ (NATO)៕