ប្រធានាធិបតីអាមេរិក លោក Donald Trump នៅថ្ងៃសុក្រ (ទី៩ ខែឧសភា) បាននិយាយថា ពន្ធ ៨០ភាគរយលើទំនិញរបស់ចិន «ទំនងជាសមរម្យ» ខណៈដែលក្រុមតំណាងនៃប្រទេសទាំង២ បានរៀបចំត្រៀមសម្រាប់កិច្ចពិភាក្សាចុងសប្តាហ៍ ដើម្បីទប់ស្កាត់សង្គ្រាមពាណិជ្ជកម្ម រវាងប្រទេសដែលមានសេដ្ឋកិច្ចធំជាងគេបំផុតទាំង២។

រដ្ឋមន្ត្រីក្រសួងរតនាគារសហរដ្ឋអាមេរិក លោក Scott Bessent និងប្រមុខអ្នកចរចាពាណិជ្ជកម្ម លោក Jamieson Greer នឹងជួបជាមួយប្រមុខដឹកនាំសេដ្ឋកិច្ចរបស់ចិន លោក He Lifeng ក្នុងប្រទេសស្វីស សម្រាប់កិច្ចពិភាក្សា ដែលអាចជាជំហានដំបូងឆ្ពោះទៅរកការដោះស្រាយជម្លោះពាណិជ្ជកម្មរបស់ប្រទេសទាំង២។

តាមរយៈការបង្ហោះ នៅលើបណ្ដាញសង្គម Truth Social លោក Trump បានលើកឡើងថា៖ «ចិនគួរតែបើកចំហទីផ្សាររបស់ខ្លួនទៅកាន់សហរដ្ឋអាមេរិក។ វានឹងល្អសម្រាប់ពួកគេ។ ការបិទទីផ្សារមិនដំណើរការទៀតទេ»។ លោក Trump បានបន្ថែមថា៖ «អត្រាពន្ធ ៨០ភាគរយលើប្រទេសចិន ទំនងជាសមរម្យ។ អាស្រ័យលើលោក Scott B (Scott Bessent)»។

គួរបញ្ជាក់ថា ចាប់តាំងពីចូលកាន់តំណែង ក្នុងខែមករា លោក Trump បានដំឡើងពន្ធលើការនាំចូលពីប្រទេសចិនដល់ទៅ ១៤៥ភាគរយ ដោយបូកបន្ថែមពីលើកម្រិតដែលលោកដាក់លើទំនិញជាច្រើនរបស់ចិន អំឡុងអាណត្តិដំបូងរបស់លោក និងបន្ថែមលើកាតព្វកិច្ចពន្ធដែលដាក់លើទីក្រុងប៉េកាំងដោយរដ្ឋបាលរបស់លោក Joe Biden។

ប្រទេសចិនបានតបតវិញដោយចេញការទប់ស្កាត់ការនាំចេញលើរ៉ែកម្រមួយចំនួន និងដំឡើងពន្ធលើទំនិញរបស់សហរដ្ឋអាមេរិកដល់ ១២៥ភាគរយ បន្ថែមពីលើពន្ធបន្ថែម ចំពោះផលិតផលជាក់លាក់មួយចំនួន ក្នុងនោះរួមមានទាំងសណ្តែកសៀង និងឧស្ម័នធម្មជាតិរាវផងដែរ៕