ភ្នំពេញ៖ កម្លាំងនាយកដ្ឋានប្រឆាំងការជួញដូរមនុស្ស និងការពារអនិតិជន នៃ​អគ្គស្នង​ការ​នគរ​បាល​​ជាតិ បានឆ្មក់ចុះបង្រ្កាបទីតាំង ភោជ្ជនីយដ្ឋាន ២កន្លែង មានយីហោ «ម្លប់ដូងខ្ទិះ ម៉ារានី » និងហាង « អង្គរ ជុំត្រជាក់ចិត្ត » ធ្វើការឃាត់មនុស្សប្រុសស្រី ជាច្រើននាក់ ពាក់ព័ន្ធករណីជួញ​​ដូរ​ផ្លូវភេទ។

ប្រតិបត្តិការនេះ បានធ្វើឡើងនៅវេលាម៉ោង ៩និង៤០នាទីយប់ ថ្ងៃទី៩ ខែឧសភា ឆ្នាំ ២០២៥ ស្ថិត​នៅ​ផ្លូវបេតុង សង្កាត់ត្រពាំងក្រសាំង ខណ្ឌ ពោធិ៍សែនជ័យ រាជធានី ភ្នំពេញ 

ប្រភពព័ត៌មានបានឲ្យដឹងថាដោយទីតាំង យីហោ «ម្លប់ដូងខ្ទិះ ម៉ារានី » និង ហាង « អង្គរ ជុំ​ត្រជាក់​ចិត្ត» ខាងលើសង្ស័យ ថាមានលួច បង្កប់នៅសេវា បម្រើផ្លូវភេទខុសច្បាប់ ទើប​នគរបាល​នាយកដ្ឋាន ដាក់កម្លាំងជំនាញ សហការជាមួយនិងកម្លាំង នគបាលខណ្ឌពោធិសែនជ័យ ចុះ​បង្រ្កាប​ជាក់​ស្តែងតែម្តង និងធ្វើការឃាត់ខ្លួនមនុស្សប្រុសស្រីបានជាច្រើននាក់ដែលពាក់ព័ន្ធ ព្រម​ទាំង​​ដក​ហូតសម្ភារៈផ្សេងៗមួយចំនួនធំ ចំណែកអ្នក ដែលមិនមានការពាក់ព័ន្ធវិញនោះ ត្រូវ​បាន​ឲ្យ​ចេញ​ត្រឡប់ទៅវិញធម្មតា ។

ក្រោយពីធ្វើការឃាត់ខ្លួនរួចនគរបាលក៏បាននាំខ្លួនមនុស្សប្រុសស្រីជាច្រើននាក់ យក​ទៅ​កាន់​នាយកដ្ឋាន ប្រឆាំងការជួញដូរមនុស្សនិងការពារអនិតិជន ដើម្បីសួរនាំបន្ត និង​ចាត់​ការ​តាម​នីតិ​វិធី​ច្បាប់​៕ អត្ថបទ៖ កុម្ភៈ