ប្រធានាធិបតីអាមេរិក លោក Donald Trump បានស្នើឱ្យកាត់បន្ថយពន្ធលើទំនិញពីប្រទេសចិន នៅក្នុងអត្ថាធិប្បាយចុងក្រោយរបស់លោក ដើម្បីបង្ហាញការចាប់អារម្មណ៍ក្នុងការបន្ធូរបន្ថយកម្ដៅសង្គ្រាមពាណិជ្ជកម្មរវាងប្រទេសមានសេដ្ឋកិច្ចធំជាងគេទាំងពីររបស់ពិភពលោក។  

លោក Trump បានសរសេរនៅលើប្រព័ន្ធផ្សព្វផ្សាយសង្គមកាលពីថ្ងៃសុក្រថាការដំឡើងពន្ធ៨០% លើប្រទេសចិនហាក់ដូចជាត្រឹមត្រូវ មុនពេលកិច្ចចរចាពាណិជ្ជកម្មរវាងប្រទេសទាំងពីរនៅប្រទេសស្វីសនៅថ្ងៃសៅរ៍សប្ដាហ៍នេះ។

អនុរដ្ឋមន្ត្រីការបរទេសចិនលោក Hua Chunying ក៏បានកំណត់ចំណាំប្រកបដោយទំនុកចិត្តមុនកិច្ចប្រជុំនោះផងដែរដោយនិយាយថាទីក្រុងប៉េកាំងមាន "ទំនុកចិត្តពេញលេញ" លើសមត្ថភាពរបស់ខ្លួនក្នុងការគ្រប់គ្រងបញ្ហាពាណិជ្ជកម្មជាមួយសហរដ្ឋអាមេរិក។

ចាប់តាំងពីវិលត្រឡប់មកសេតវិមានវិញ លោក Trump បានដាក់សម្ពាធលើការនាំចូលរបស់ប្រទេសចិនដោយដំឡើងពន្ធរហូតដល់១៤៥% ហើយប្រទេសចិនបានសងសឹកវិញលើការដំឡើងពន្ធចំនួន១២៥%លើទំនិញមួយចំនួនរបស់សហរដ្ឋអាមេរិក ដែលរុញឱ្យទំហំពាណិជ្ជកម្មរវាងប្រទេសទាំងពីរធ្លាក់ចុះ។

លោក Dan Wang មកពីក្រុមហ៊ុនប្រឹក្សាហានិភ័យនយោបាយ Eurasia Group បានប្រាប់ទូរទស្សន៍ BBC ថា ក្រុមមន្ត្រីទាំងនៅទីក្រុងវ៉ាស៊ីនតោន ទាំងនៅទីក្រុងប៉េកាំង ស្ថិតនៅក្រោមសម្ពាធសេដ្ឋកិច្ចដែលចេះតែកើនឡើង៕