បាល់ទាត់៖ ​ក្រុម​ការពារ​ជើងឯក AFF Championship វៀតណាម​បាន​បន្ត​រកបាន​ជ័យជំនះ ២ប្រកួត​ផ្ទួនៗ​នៅក្នុង​ពូ​ល B ក្រោយ​យកឈ្នះ​ម៉ាឡេស៊ី ៣-០​។ វៀតណាម​ត្រូវការ​ពេល​ជាង​កន្លះ​ម៉ោង​ ទើប​អាច​បំបែក​ប្រព័ន្ធ​ការពារ​ម៉ាឡេស៊ី​បាននៅពេល Nguyen Quang Hai ស៊ុត​បញ្ចូល​ទី​បើក​ការ​នាំមុខ​នៅ​នាទី​ទី៣២ មុន​ពេលដែល​គ្រាប់​ទី​ពីរ​កើតឡើង ៤នាទី​បន្ទាប់​ធ្វើបាន​ដោយ Nguyen Cong Phoung​។

​​វគ្គ​ទី២ វៀតណាម​ផ្លាស់ប្តូរ​កីឡាករ​បម្រុង​ចូល​ច្រើន និង​រកបាន​មួយ​គ្រាប់​ចុងក្រោយ​នៅ​នាទី​ទី៨៩ ដោយ Nguyen Hoang Duc ខណៈ​ម៉ាឡេស៊ី​ក៏មាន​ឱកាស​រក​គ្រាប់​បាល់​មកវិញ​ដែរ​តែ​គ្មាន​សំណាង​។ ​​ក្រោយ​ចប់​ការប្រកួត​គ្រូបង្វឹក​វៀតណាម​លោក Park Hang-seo ថា​នេះ​គឺជា​ការប្រកួត​ដ៏​លំបាក​មួយ​សំរាប់​ក្រុម​វៀតណាម ​ទោះបី​រកបាន​ជ័យជំនះ​ក្តី​។ ​​ចំណែក​គ្រូបង្វឹក​ម៉ាឡេស៊ី​លោក Tan Cheng Hoe ថា ​វៀតណាម​ជា​ក្រុម​ល្អ​ជាង ក្រុម​របស់លោក​បន្ត​ស្ថិតិ​មិនល្អ​ពេល​ជួប​វៀតណាម តែ​ចំពោះមុខ​គឺ​ប្រមូលផ្តុំ​កំលាំង​មកវិញ​ ខណៈ​ម៉ាឡេស៊ី​សល់​ពេលវេលា​ច្រើន​មុន​ជួប​ឥណ្ឌូនេស៊ី​ប្រកួត​ចុងក្រោយ​ក្នុង​ពូ​ល​។

​​សូមបញ្ជាក់ថា ​ក្នុង​ពូ​ល B នេះ​បី​ក្រុម​មាន ៦ពិន្ទុ​ដូចគ្នា​រួមមាន​ឥណ្ឌូនេស៊ី​លើ​គេ លេខ២ វៀតណាម និង​លេខ៣ ម៉ាឡេស៊ី​ តែ​ម៉ាឡេស៊ីប្រកួត​បាន​បី​លើក​។ ​ប្រកួត​បន្ទាប់​វៀតណាម​ជួប​ឥណ្ឌូនេស៊ី​នៅ​ថ្ងៃទី១៥ ខណៈ​ម៉ាឡេស៊ី​ជួប​ឥណ្ឌូនេស៊ី​ដែរ​នៅ​ថ្ងៃទី១៩ ខែធ្នូ​នេះ​៕

​អត្ថបទ​៖​នាង សុភា​វុ​ធ