យោងតាមមន្ត្រីក្នុងតំបន់បានឱ្យដឹងថា ទឹកជំនន់ដ៏ខ្លាំងក្លាទាំងយប់បានជន់លិចភូមិជាច្រើននៅក្នុងសាធារណៈរដ្ឋប្រជាធិបតេយ្យកុងហ្គោ ដោយបានសម្លាប់មនុស្សជាង ១០០នាក់ ក្នុងប្រទេសដែលទទួលរងគ្រោះដោយសង្គ្រាម និងការភៀសខ្លួនដ៏ធំមួយនេះ។

ទឹកជំនន់ត្រូវបានបង្កឡើងដោយភ្លៀងធ្លាក់ខ្លាំង ហើយបានហក់ឡើងលិចភូមិ Kasaba ក្នុងខេត្ត South Kivu ក្នុងអំឡុងពេលយប់ថ្ងៃព្រហស្បតិ៍ដល់ថ្ងៃសុក្រសប្ដាហ៍មុន នេះបើតាមមន្ត្រីប្រចាំតំបន់លោក Bernard Akili ដែលបានប្រាប់ទីភ្នាក់ងារសារព័ត៌មាន AFP កាលពីថ្ងៃសៅរ៍។

លោកបាននិយាយថា ភ្លៀងធ្លាក់ខ្លាំងបានធ្វើឱ្យទឹកក្នុងទន្លេ Kasaba ហក់ឡើងខ្ពស់លិចច្រាំងពេញមួយយប់ ហូរគួចអ្វីៗគ្រប់យ៉ាងរបស់អ្នកស្រុក មុនពេលបំផ្លាញផ្ទះសម្បែងនៅមាត់បឹង។លោកបានថ្លែងថា ជនរងគ្រោះដែលបានស្លាប់ភាគច្រើនជាកុមារ និងមនុស្សចាស់។

លោក Sammy Kalonji អ្នកគ្រប់គ្រងតំបន់បាននិយាយថា ទឹកជំនន់បានសម្លាប់មនុស្សយ៉ាងហោចណាស់ ១០៤ នាក់ និងបណ្តាលឱ្យខូចខាតទ្រព្យសម្បត្តិដ៏ធំសម្បើម ជាមួយគ្នានោះមនុស្ស២៨នាក់ បានរងរបួស ហើយលំនៅឋានជាង១៥០ខ្នងត្រូវបានបំផ្លាញ ៕