សៀមរាប៖ អាជ្ញាធរជាតិអប្សរា សហការជាមួយវិស័យឯកជន រៀបចំពិធីបួងសួងសុំសេចក្តី សុខតាមទំនៀមបុរាណបែបពុទ្ធសាសនា និងព្រហ្មញ្ញសាសនានៅលើប្រាសាទភ្នំ បាខែង។

ពិធីនេះ ក្រោមវត្តមានឯកឧត្តម ហង់ ពៅ អគ្គនាយកអាជ្ញាធរជាតិអប្សរា និងលោកជំទាវឧកញ៉ាបណ្ឌិត សៀង ចាន់ហេង អគ្គនាយិការក្រុមហ៊ុនហេងអភិវឌ្ឍន៍ និងសហការី ព្រះសង្ឃ រួមទាំងប្រជាពលរដ្ឋចូលរួមយ៉ាងកុះករ នៅព្រឹកថ្ងៃទី១៣ ខែធ្នូ ឆ្នាំ២០២១។

ពិធីបួងសួងនេះរៀបចំឡើង ក្នុងគោលបំណងរំលឹកគុណដល់អតីតព្រះមហាក្សត្រគ្រប់ព្រះអង្គ និង បុព្វការីជន ដែលបានកសាង និងថែរក្សាប្រាសាទបុរាណ ទាំងអស់នៅក្នុងរមណីយដ្ឋានអង្គរ ដែល បានបន្សល់ទុកកេរ្តិ៍ដំណែល ព្រមទាំងបានផ្តល់អត្ថប្រយោជន៍ជាច្រើន ដល់កូនចៅជំនាន់ក្រោយ ព្រមទាំងជាតិមាតុភូមិតាំងពីដើមរហូតដល់សព្វថ្ងៃ៕