សន្ទស្សន៍ផ្សារភាគហ៊ុនទូទាំងពិភពលោក ជាពិសេស Wall Street របស់អាមេរិក បានកើនឡើង ហើយប្រាក់ដុល្លារមានភាពរឹងមាំ នាថ្ងៃចន្ទ (១២ ឧសភា) នេះ ខណៈសញ្ញានៃវឌ្ឍនភាពក្នុងកិច្ចចរចាពាណិជ្ជកម្មរវាងសហរដ្ឋអាមេរិក និងចិន បានជំរុញឱ្យមានក្ដីសង្ឃឹមថា វិបត្តិសេដ្ឋកិច្ចសកលអាចត្រូវបានបញ្ចៀស ទោះបីជាព័ត៌មានលម្អិតនៃកិច្ចព្រមព្រៀងណាមួយនៅតែមិនទាន់មានក៏ដោយ។

ភាពតានតឹងផ្នែកភូមិសាស្ត្រនយោបាយក៏មើលទៅហាក់ធូរស្រាលផងដែរ ជាមួយនឹងបទឈប់បាញ់ដ៏ផុយស្រួយដែលធ្វើឡើងរវាងឥណ្ឌា និងប៉ាគីស្ថាន ខណៈប្រធានាធិបតីអ៊ុយក្រែន លោក Volodymyr Zelenskiy បាននិយាយថា លោកត្រៀមខ្លួនជាស្រេចដើម្បីជួបមេដឹកនាំរុស្ស៊ី លោក Vladimir Putin នៅក្នុងប្រទេសទួរគី នាថ្ងៃព្រហស្បតិ៍សប្ដាហ៍នេះសម្រាប់ការពិភាក្សាសន្តិភាព។

ទីផ្សារបានប្រតិកម្មលើដំណឹងល្អជាច្រើននេះដោយការជំរុញឱ្យហ៊ុនអាមេរិក S&P 500 កើនឡើង ១,២% ខណៈ Nasdaq ងើបបាន ១,៤%។ ចំណែកហ៊ុនអឺរ៉ុប EUROSTOXX 50 បានពង្រឹងជំហរ ០,៩% ខណៈសន្ទស្សន៍ FTSE បន្ថែមតួលេខ ០,៤% និងភាគហ៊ុន DAX ក៏កើន ០,៧% ផងដែរ។

នៅអាស៊ីវិញ ហ៊ុន Nikkei របស់ជប៉ុន ឡើងបាន ០,៣% ហើយកូរ៉េខាងត្បូង មានកំណើន ០,៤%។ ប្រាក់ដុល្លារបានបន្ថែមតម្លៃ ០,៤% ទល់ប្រាក់យ៉េនដ៏សុវត្ថិភាពរបស់ជប៉ុន ក្នុងតួលេខ ១៤៥,៩០យ៉េនក្នុងមួយដុល្លារ ចំណែកប្រាក់អឺរ៉ូ ធ្លាក់ចុះ ០,២% នៅតម្លៃ ១,១២២៤ដុល្លារក្នុងមួយអឺរ៉ូ។ វិនិយោគិនសង្ឃឹមថា សេតវិមាននឹងបន្ថយពន្ធ ១៤៥% លើទំនិញចិន ក្នុងពេលឆាប់ៗបន្ទាប់ពីកិច្ចប្រជុំរវាងភាគីទាំងពីរ បើទោះបីជាមកត្រឹមតែ ៦០% ដែលលោកប្រធានាធិបតី Donald Trump បានលើកឡើងដំបូង ក៏ជារឿងធូរស្រាលបន្តិចដែរ៕