​​ប្រណាំង​រថយន្ត​៖ ​កីឡាករ​សញ្ជាតិ​ហូ​ឡង់ Max Verstappen បាន​ក្លាយជា​ជើងឯក F1 ពិភពលោក​ជា​លើកដំបូង​ក្នុង​អាជីព​ ក្រោយ​យកឈ្នះ​ការប្រកួត​ទីលាន​ចុងក្រោយ​នៅ​ទីក្រុង Abu Dhabi អារ៉ាប់​រួម​។ ​​ជា​លើកដំបូង​ក្នុង​ប្រវត្តិសាស្ត្រ F1 ដែល​កីឡាករ​ពីររូប​មាន​ពិន្ទុ​ស្មើគ្នា​ត្រូវ​ប្រជែង​គ្នា​ដណ្តើម​ជើងឯក​ពិភពលោក​នៅ​ទីលាន​ចុងក្រោយ​បិទ​រដូវ​កាល​។

មិន​ត្រឹមតែ​ប្រជែង​គ្នា​នៅ​ទីលាន​ចុងក្រោយ​ទេ Max Verstappen និង Lewis Hamilton ថែមទាំង​ត្រូវការ​ជុំ​ចុងក្រោយ​ដើម្បី​ប្រជែង​គ្នា​ថែមទៀត​។ ​Lewis Hamilton ដែល​ចេញដំណើរ​ពីក្រោយ​តែ​បាន​ឡើងមក​នាំមុខ Verstappen តាំងពី​ដំបូង​។ ​សំណាង​មិនចេះ​តែមាន​សំរាប់​កីឡាករ​របស់​ក្រុម Mercedes រូបនេះ​ទេ ពោលគឺ​នៅពេល Nicolas Latifi របស់​ក្រុម Williams បុក​របង​នៅពេល​សល់ ៥ជុំ​ទៀត​ចប់ធ្វើឱ្យ​រថយន្ត​ទាំង​ត្រូវ​ផ្អាក​ប្រណាំង ​និង​ជិះ​ពីក្រោយ​រថយន្ត​សុវត្ថិភាព​ដល់​ទៅ ៤ជុំ​ទំរាំ​ទីលាន​ត្រូវបាន​បោសសំអាត​។

​​នៅសល់តែ ១ជុំ​ចុងក្រោយ​កីឡាករ​របស់ Red Bull, Max Verstappen បាន​វ៉ា​ជែង Hamilton បាន​សំរេច​មិន​គួរ​ឱ្យ​ជឿ​។​ ​ក៏មាន​រឿង​ចម្រូង​ចម្រាស​ប្តឹងតវ៉ា​ដែរ​ពី​ក្រុម Mercedes ត្រូវ​បាន F1 ច្រានចោល​។ ​សូមបញ្ជាក់ថា Max Verstappen បាន​ក្លាយជា​កីឡាករ​ហូ​ឡង់​ទី១ ដែល​ឈ្នះ​ជើងឯក F1 ពិភពលោក​ ខណៈ Lewis Hamilton ត្រូវ​រង់ចាំ​បន្តទៀត ​ដើម្បី​បំបែក​កំណត់ត្រា​កីឡាករ​ដែល​ឈ្នះ​ជើងឯក​ពិភពលោក​បាន​ច្រើនជាងគេ​សរុប ៨លើក​៕

​អត្ថបទ​៖​នាង សុភា​វុ​ធ