នៅពេលដែលលោកប្រធានាធិបតីអាមេរិក Donald Trump ចុះចតនៅទីក្រុងរីយ៉ាដ នាថ្ងៃអង្គារ (១៣ ឧសភា) ស្អែកនេះសម្រាប់ដំណើរទស្សនកិច្ចមជ្ឈិមបូព៌ា លោកនឹងត្រូវបានស្វាគមន៍ដោយពិធីដ៏ឱឡារឹក និងការរំពឹងទុកនៃការវិនិយោគជាច្រើនតម្លៃ ១សែនកោដិដុល្លារ ប៉ុន្តែ សង្រ្គាមដ៏ក្ដៅគគុកនៅដែនដីហ្កាហ្សា បានបង្កភាពមិនច្បាស់លាស់ដល់គោលដៅមួយដែលលោកចង់បានជាយូរមកហើយ នោះគឺការធ្វើប្រក្រតីភាពទំនាក់ទំនងរវាងអារ៉ាប៊ីសាអ៊ូឌីត និងអ៊ីស្រាអែល។

ប្រភពក្នុងប្រទេសឈូងសមុទ្រដែលស្និទ្ធនឹងមន្រ្តីផ្ទៃក្នុង និងមន្ត្រីអាមេរិកបានឱ្យដឹងថា នៅពីក្រោយឆាក ក្រុមមន្ត្រីអាមេរិកកំពុងដាក់សម្ពាធយ៉ាងស្ងាត់ៗដល់អ៊ីស្រាអែល ឱ្យយល់ព្រមលើបទឈប់បាញ់ភ្លាមៗនៅតំបន់ហ្កាហ្សា ដែលជាលក្ខខណ្ឌមួយរបស់អារ៉ាប៊ីសាអ៊ូឌីត សម្រាប់ការចាប់ផ្តើមឡើងវិញនូវកិច្ចចរចាប្រក្រតីភាពទំនាក់ទំនង។

ប្រេសិតមជ្ឈិមបូព៌ារបស់អាមេរិក គឺលោក Steve Witkoff បាននិយាយនៅស្ថានទូតអ៊ីស្រាអែល ក្នុងទីក្រុងវ៉ាស៊ីនតោន នាសប្តាហ៍មុនថា លោករំពឹងថានឹងមានការរីកចម្រើនភ្លាមៗលើការពង្រីកកិច្ចព្រមព្រៀង Abraham ដែលជាសំណុំនៃកិច្ចព្រមព្រៀងសម្របសម្រួលដោយលោក Trump នៅក្នុងអាណត្តិទីមួយ ដែលនៅក្រោមកិច្ចព្រមព្រៀងនោះ រដ្ឋអារ៉ាប់ជាច្រើនរួមមាន អារ៉ាប់រួម បារ៉ែន ស៊ូដង់ និងម៉ារ៉ុក ទទួលស្គាល់អ៊ីស្រាអែល។

ប្រភពសង្កត់ធ្ងន់ថា ទោះបីជាយ៉ាងណាក៏ដោយ ការប្រឆាំងដោយលោកនាយករដ្ឋមន្ត្រីអ៊ីស្រាអែល Benjamin Netanyahu ចំពោះការបញ្ឈប់ជាអចិន្ត្រៃយ៍នូវសង្គ្រាមហ្កាហ្សា ឬការបង្កើតរដ្ឋប៉ាឡេស្ទីន ទំនងជាមិនធ្វើឱ្យមានវឌ្ឍនភាពលើកិច្ចចរចាស្រដៀងគ្នានេះជាមួយទីក្រុងរីយ៉ាដទេ។ គួរឱ្យដឹងថា អារ៉ាប៊ីសាអ៊ូឌីតមិនទទួលស្គាល់អ៊ីស្រាអែល ជារដ្ឋស្របច្បាប់ឡើយ មានន័យថា ប្រទេសសេដ្ឋកិច្ចជឿនលឿនបំផុត និងជាមហាអំណាចយោធាទាំងពីរនៅមជ្ឈិមបូព៌ានេះ ពុំមានទំនាក់ទំនងការទូតផ្លូវការទេ៕