ឯកឧត្តម ជា ធីរិទ្ធ អ្នកនាំពាក្យព្រឹទ្ធសភានៃព្រះរាជាណាចក្រកម្ពុជា បានបញ្ជាក់ថា តាមរយៈដំណើរទស្សនកិច្ចរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា ត្រូវបានមេដឹកនាំអាស៊ានផ្ដល់តម្លៃខ្ពស់បំផុត និងចាត់ទុកសម្ដេចតេជោជារដ្ឋបុរសដ៏មានបទពិសោធន៍ និងឥទ្ធិពលនៅអាស៊ីអាគ្នេយ៍។
តាមរយៈកិច្ចសម្ភាសន៍ជាមួយ BTV កាលពីម្សិលមិញ ឯកឧត្តម ជា ធីរិទ្ធ បានបញ្ជាក់បន្ថែមថា ដំណើរទស្សនកិច្ចទៅកាន់ប្រទេសឥណ្ឌូនេស៊ី និងទីម័រឡេស្តេ របស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា គឺជាព្រឹត្តិការណ៍ប្រវត្តិសាស្ត្រថ្មីមួយទៀតដែលមានអត្ថន័យដ៏ធំធេងមហិមាសម្រាប់កម្ពុជា និងតំបន់អាស៊ីអាគ្នេយ៍ទាំងមូល។ តាមរយៈការទទួលបដិសណ្ឋារកិច្ចដ៏វិសេសវិសាល និងតាមរយៈពាក្យពេចន៍របស់មេដឹកនាំនៃប្រទេសម្ចាស់ផ្ទះទាំងពីរ ក៏ដូចជាគ្រឿងឥស្សរិយយសខ្ពស់បំផុតដែលសម្តេចទទួលបានពីទីម័រឡេស្ដេ សបញ្ជាក់យ៉ាងច្បាស់ថា វីរភាពសម្តេចតេជោ ហ៊ុន សែន ត្រូវបានគោរព និងឱ្យតម្លៃមិនត្រឹមតែកម្ពុជាប៉ុណ្ណោះទេ ប៉ុន្ដែសុសសាយទៅដល់លើឆាកតំបន់ និងអន្តរជាតិថែមទៀត។
ដំណើរទស្សនកិច្ចរបស់សម្ដេចតេជោ នៅឥណ្ឌូនេស៊ី និងទីម័រឡេស្ដេ ក្រៅពីការទទួលបដិសណ្ឋារកិច្ចប្រកបដោយកិត្តិយសចំពោះសម្តេចតេជោ ហ៊ុន សែន យ៉ាងអធិកអធមក្រៃលែងនោះ ប្រធានាធិបតីឥណ្ឌូនេស៊ី និងទីម័រឡេស្ដេ បានហៅសម្តេច ហ៊ុន សែនថា ជារដ្ឋបុរសដ៏មានបទពិសោធនៅអាស៊ីអាគ្នេយ៍ និងជាមិត្តិជិត្តស្និទ្ធដ៏អស្ចារ្យរបស់ពួកគេផងដែរ។ ថ្នាក់ដឹកនាំព្រឹទ្ធសភា និងរដ្ឋសភាឥណ្ឌូនេស៊ីក៏បានផ្តល់តម្លៃយ៉ាងខ្ពស់ដល់សម្តេចតេជោ ហ៊ុន សែន ក្នុងនាមជារដ្ឋបុរសដ៏មានឥទ្ធិពល និងបានកោតសរសើរមិនដាច់ពីមាត់ពីវីរភាពរបស់សម្តេចក្នុងបុព្វហេតុជាតិមាតុភូមិដែលបានទាញកម្ពុជាពីភាពកំសត់ ទុគ៌តដ៏គួរឱ្យអាណិតអាសូរ មកជាប្រទេសដែលមានមុខមាត់ ទំនើបជឿនលៀន លើឆាកតំបន់ និងអន្តរជាតិ។
សូមបញ្ជាក់ថា តាមរយៈដំណើរទស្សនកិច្ចរបស់សម្ដេចតេជោ ហ៊ុន សែន នៅឥណ្ឌូណេស៊ី និងទីម័រឡេស្ដេ កាលពីថ្ងៃទី៥ ដល់ថ្ងៃទី៩ ខែឧសភាកន្លងទៅនេះ កេរ្តិ៍ឈ្មោះ និងឥទ្ធិពលរបស់សម្តេចតេជោ មិនត្រឹមតែទទួលបានការផ្តល់តម្លៃពីសំណាក់ប្រជាពលរដ្ឋខ្មែរប៉ុណ្ណោះទេ ប៉ុន្ដែបានបង្ហាញយ៉ាងច្បាស់នៅក្នុងតំបន់និងក្នុងពិភពលោក តាមរយៈការចូលរួមចំណែកយ៉ាងសំខាន់របស់សម្តេចក្នុងការកសាងសន្តិភាពសម្រាប់មនុស្សជាតិនៅលើភពផែនដី។ ស្នាដៃ និងគុណតម្លៃរបស់សម្តេចតេជោ ដែលជាធនធានមិនចេះរីងស្ងួតសម្រាប់មនុស្សជាតិ ពិតជាស័ក្តិសមណាស់ក្នុងការទទួលបាននូវមហាកិត្តិយសដែលផ្តល់ជូនដោយប្រជាពលរដ្ឋខ្មែរ និងថ្នាក់ដឹកនាំក្នុងតំបន់ និងពិភពលោក។ ប្រជាពលរដ្ឋខ្មែរពិតជាមានមោទនភាពយ៉ាងក្រៃលែងចំពោះរដ្ឋបុរសដ៏ឆ្នើម គឺសម្ដេចតេជោ ដែលបាននឹងកំពុងរះចិញ្ចែងលើឆាកតំបន់ និងអន្តរជាតិ៕ អត្ថបទ៖ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
