ភ្នំពេញ ៖ ព្រះសង្ឃ និងប្រជាពុទ្ធបរិស័ទកម្ពុជា-ចិន រាប់រយអង្គ/នាក់ បានរួមគ្នាប្រារព្ធពិធីដង្ហែបុណ្យពិសាខបូជា និងវេទិកា «ពន្លឺនៃក្ដីស្រឡាញ់មាតា» នៅកម្ពុជា ដែលប្រារព្ធធ្វើឡើងនៅបរិវេណវត្តមង្គលមានលក្ខណ៍ ហៅវត្តត្រពាំងគល់ ក្រោមអធិបតីភាពព្រះមង្គលបញ្ញាបណ្ឌិត សៅរ៍ តារាវី ព្រះរាជាគណៈថ្នាក់កិត្តិយស ជាព្រះគ្រូធីរវង្សាចារ្យ ព្រះអនុគណស្រុកត្រាំកក់ ខេត្តតាកែវ ព្រមទាំងមានការនិមន្ត និងអញ្ជើញចូលរួមពីព្រះសង្ឃ និងប្រជាពុទ្ធបរិស័ទកម្ពុជា និងចិន។

​នៅក្នុងកម្មវិធី កាលពីថ្ងៃទី១១ ខែឧសភា ឆ្នាំ២០២៥កន្លងទៅ ព្រះមង្គលបញ្ញាបណ្ឌិត សៅរ៍ តារាវី បានឱ្យដឹងថា ពិធីបុណ្យវិសាខបូជា គឺជាពិធីបុណ្យដ៏ធំមួយក្នុងព្រះពុទ្ធសាសនា ដែលប្រទេសកម្ពុជាបានចាត់ទុកជាបុណ្យជាតិ ដែលប្រារព្ធឡើង គឺដើម្បីរម្លឹកដល់ព្រឹត្តិការណ៍នក្ខត្តសម័យដ៏ពិសេសចំនួន៣ ដែលទាក់ទងនឹងព្រះសម្មាសម្ពុទ្ធ គឺទី១- ព្រះអង្គទ្រង់ប្រសូត ទី២- ព្រះអង្គទ្រង់ត្រាស់ដឹង និងទី៣- ព្រះអង្គទ្រង់ចូលបរិនិព្វាន។ ពិធីបុណ្យនេះ ក៍ត្រូវអង្គការសហប្រជាជាតិ បានប្រកាសទទួលស្គាល់ “វិសាខបូជា” ជាពិធីបុណ្យសាសនាអន្តរជាតិដែលបុគ្គលិកធ្វើការនិងសាធារណៈជនអាចប្រារព្ធធ្វើបាននៅទូទាំងពិភពលោកទៀតផង។ 

លោក អានទី វ័ង (Andy Wang) ប្រធានមូលនិធិវេទិកាស្នេហាមាតាពិភពលោក បានបញ្ជាក់ថា នៅលើពិភពលោកមានសេចក្តីស្រលាញ់មួយដែលមិនអាចលុបបំបាត់បាន គឺសេចក្តីស្រលាញ់របស់មាតា។ សេចក្តីស្រលាញ់របស់មាតាគឺមិនមានដែនកំណត់ ហើយនៅលើពិភពលោកគ្មានអ្វីធំជាងនេះឡើយ។ ដូច្នេះកម្មវិធីថ្ងៃនេះ គឺជាសន្និបាតលើកទី២ នៃសេចក្តីស្រលាញ់របស់មាតានៅកម្ពុជា ហើយនឹងមានការជំរុញទូទាំងប្រទេសលើពិភពលោក ដើម្បីជ្រើសរើសមាតាឆ្នើមទាំង១០រូបនៅក្នុងប្រទេសនីមួយៗ។

បើតា អ្នកនាង ខួយ ហៃលាន (Cui Hailian) ស្ថាបនិក និងជាប្រធានវេទិកាស្នេហាមាតាពិភពលោក និងលោកបណ្ឌិត ឆីវ ហ្វៃឡុង (Qiu Feilong) ស្ថាបនិកនៃវេទិកាស្នេហាមាតាពិភពលោក បានចាត់ទុកកម្មវិធីនេះ គឺជាការផ្តល់ប្រឹក្សាយោបល់នូវសេចក្តីស្រលាញ់ដល់មាតានៃពិភពលោកចាប់ផ្តើមពីប្រទេសកម្ពុជា យើងនឹងជំរុញចលនាសន្តិភាពពិភពលោក ផ្តើមពីចំនុចនៃសេចក្តីស្រលាញ់របស់មាតា។ លោកបណ្ឌិតបន្តថា ក្នុងប្រទេសនីមួយៗមានវប្បធម៌របស់ខ្លួនឯងរៀងៗខ្លួន ដូច្នេះចលនានៃក្តីស្រលាញ់របស់មាតា គឺអាចជំរុញផ្សព្វផ្សាយដល់សម្ព័ន្ធសារព័ត៌មាន និងធ្វើឱ្យមានចលនាទេសចរណ៍ ដែលអាចធ្វើឱ្យមានកំណើនភ្ញៀវទេសចររាប់លាន រាប់ពាន់នាក់មកដល់ប្រទេសកម្ពុជា៕