ឥណ្ឌា កំពុងតែជួបការលំបាកក្នុងការដោះស្រាយបញ្ហាខ្យល់កខ្វក់ ខណៈកុមារជាច្រើនកំពុងប្រឈមបញ្ហាសុខភាព ដោយសារតែផ្សែងអ័ព្ទពុលដ៏ក្រាស់បានគ្របដណ្ដប់ទឹកដីធំៗនៃរដ្ឋធានី។ ឥឡូវនេះ ទីក្រុងដេលី បានក្លាយជារដ្ឋធានីដែលបរិស្ថានមានខ្យល់បំពុលខ្លាំងបំផុតរបស់ពិភពលោក សម្រាប់ពេល ៦ឆ្នាំជាប់ៗគ្នា នេះបើយោងតាមរបាយការណ៍គុណភាពខ្យល់ពិភពលោកប្រចាំឆ្នាំ ដោយស្ថាប័នត្រួតពិនិត្យគុណភាពខ្យល់របស់ប្រទេសស្វីស IQAir។

នៅក្នុងខែវិច្ឆិកា ឆ្នាំមុន សន្ទស្សន៍គុណភាពខ្យល់ (AQI) របស់ក្រុងដេលី បានឡើងដល់តួលេខ ៧៩៥ ដែលស្ទើរតែ ៨ដងលើសកម្រិតកំណត់ ១០០ ដែលបង្ហាញថាគុណភាពខ្យល់ក្លាយជាមិនល្អ។ នៅក្នុងតំបន់ខ្លះ AQI ឈានដល់កម្រិត ១.១៨៥ យ៉ាងគ្រោះថ្នាក់។

ប៉ុន្តែខ្យល់បំពុលនេះមិនស្ថិតនៅតែក្នុងក្រុងដេលីទេ ដោយយោងតាម IQAir បានឱ្យដឹងថា ទីក្រុងចំនួន៦ ក្នុងចំណោម១០ របស់ពិភពលោក ដែលមានខ្យល់បំពុលអាក្រក់បំផុតកាលពីឆ្នាំមុន - ក្នុងតួលេខ ៧៤ក្នុងចំណោមទីក្រុងចំនួន១០០ - គឺស្ថិតនៅក្នុងប្រទេសឥណ្ឌា។

ទោះយ៉ាងនេះក្ដី ខ្យល់ពុលមិនមែនជាបញ្ហានយោបាយក្នុងឥណ្ឌាឡើយ ហើយការរស់នៅជាមួយខ្យល់កខ្វក់បែបនេះស្ទើតែក្លាយទៅជាបទដ្ឋានធម្មតាទៅហើយសម្រាប់អ្នកស្រុក។ កង្វះការជំរុញផ្នែកនយោបាយពីប្រជាជនគឺជាឧបសគ្គចម្បងក្នុងការផ្លាស់ប្តូរ ខណៈអ្នកជំនាញព្រមានថា វិបត្តិនេះមិនអាចត្រូវអើពើទៀតទេ ព្រោះចំនួនអ្នកស្លាប់ និងផលប៉ះពាល់សេដ្ឋកិច្ចកើនឡើង។

ខណៈដែលទីក្រុងដេលី បានដាក់ចេញនូវវិធានការកាត់បន្ថយការបំភាយឧស្ម័នដ៏តឹងរ៉ឹង ដូចជាប្រេងឥន្ធនៈស្អាត និងការលើកទឹកចិត្តឱ្យប្រើរថយន្តអគ្គិសនីក៏ដោយ ប៉ុន្តែការអនុវត្តនៅតែខ្សោយ ដែលជាបញ្ហាប្រឈមដ៏លំបាក៕