រដ្ឋាភិបាលស្រមោលរបស់សហភាពមីយ៉ាន់ម៉ា បានប្រាប់ឲ្យដឹងថា ការវាយប្រហារតាមអាកាសដោយរបបយោធាដែលកំពុងកាន់អំណាច បានសម្លាប់សិស្សានុសិស្សយ៉ាងហោចណាស់ ១៧នាក់ ហើយ ២០នាក់ផ្សេងទៀត បានរងរបួសនៅឯសាលារៀនមួយក្នុងតំបន់គ្រប់គ្រងដោយក្រុមប្រឆាំង នៅថ្ងៃចន្ទ (ទី១២ ខែឧសភា) បើទោះបីជាកំពុងមានបទឈប់បាញ់ក្រោយគ្រោះរញ្ជួយដីដ៏បំផ្លិចបំផ្លាញក៏ដោយ។

សាលាដែលដំណើរការដោយរដ្ឋាភិបាលស្រមោល គឺរដ្ឋាភិបាលរួបរួមជាតិ (NUG) ស្ថិតនៅក្នុងទីក្រុង Depayin ភាគកណ្តាលសហភាពមីយ៉ាន់ម៉ា ក្នុងតំបន់ Sagaing ដោយមានចម្ងាយប្រហែល ១៦០គីឡូម៉ែត្រ នៅភាគខាងជើងនៃទីក្រុង Mandalay និងមិនឆ្ងាយប៉ុន្មានឡើយពីចំណុចកណ្តាលនៃគ្រោះរញ្ជួយដី កាលពីថ្ងៃទី២៨ ខែមីនា។

អ្នកនាំពាក្យរបស់ NUG លោក Nay Phone Latt បានប្រាប់ឲ្យដឹងថា៖ «តាមព័ត៌មានដែលយើងទទួលបានរហូតមកដល់ពេលនេះ សិស្ស ១៧នាក់ បានបាត់បង់ជីវិត ហើយ ២០នាក់ទៀតរងរបួស»។ អ្នកនាំពាក្យរូបនេះបានបន្ថែមថា៖ «មនុស្សមួយចំនួនប្រហែលជាបាន និងកំពុងបាត់ខ្លួនដោយសារការទម្លាក់គ្រាប់បែក ដូច្នេះ ចំនួនអ្នកស្លាប់អាចខ្ពស់ជាងនេះ»។

គួរបញ្ជាក់ថា មីយ៉ាន់ម៉ាត្រូវបានជាប់ក្នុងជម្លោះ គិតចាប់តាំងពីយោធាបានប្រើប្រាស់កម្លាំងយ៉ាងខ្លាំងក្លា ដើម្បីបង្ក្រាបការតវ៉ាប្រឆាំងនឹងការវិលទៅកាន់កាន់អំណាចរបស់ខ្លួន តាមរយៈរដ្ឋប្រហារឆ្នាំ២០២១។ យោធាបាន និងកំពុងជួបការលំបាកក្នុងការគ្រប់គ្រង ហើយបានបាត់បង់តំបន់ដែនដីជាច្រើនទៅក្នុងដៃក្រុមបះបោរ គឺកងទ័ពជនជាតិភាគតិច និងចលនាតស៊ូដែលមានទំនាក់ទំនងជាមួយ NUG។

អ្នកនាំពាក្យរបបយោធាបានបដិសេធមិនធ្វើអត្ថាធិប្បាយអ្វីឡើយ នៅពេលត្រូវបានទាក់ទងដោយទីភ្នាក់ងារសារព័ត៌មាន Reuters។ កាលពីសប្តាហ៍មុន រដ្ឋាភិបាលយោធា បានប្រាប់ថា ខ្លួនកំពុងបន្តបទឈប់បាញ់ក្រោយគ្រោះរញ្ជួយដីដល់ថ្ងៃទី៣១ ខែឧសភា។ របបនេះបានប្រកាសពីបទឈប់បាញ់នៅដើមខែមេសា ពោលគឺប៉ុន្មានថ្ងៃក្រោយគ្រោះរញ្ជួយដី ដើម្បីគាំទ្រដល់កិច្ចប្រឹងប្រែងសង្គ្រោះ បន្ទាប់ពីមានវិធានការស្រដៀងគ្នារបស់ក្រុមប្រដាប់អាវុធប្រឆាំងរបបយោធា៕