ប្រទេសឥណ្ឌា នៅថ្ងៃចន្ទ (ទី១២ ខែឧសភា) នេះ បានប្រាប់ឲ្យដឹងថា ខ្លួនបានបើកដំណើរការឡើងវិញនូវអាកាសយានដ្ឋានចំនួន ៣២ ដែលត្រូវបានបិទ ក្នុងអំឡុងពេលមានការប៉ះទង្គិចជាមួយប្រទេសជិតខាងប៉ាគីស្ថាន បន្ទាប់ពីបានឈានដល់បទឈប់បាញ់កាលពីចុងសប្តាហ៍។

អាជ្ញាធរអាកាសយានដ្ឋាននៃប្រទេសឥណ្ឌា បានឲ្យដឹងនៅក្នុងសេចក្តីថ្លែងការណ៍ថា អាកាសយានដ្ឋានចំនួន ៣២ ឥឡូវនេះ អាចមានសម្រាប់ប្រតិបត្តិការយន្តហោះស៊ីវិល ដោយមានប្រសិទ្ធិភាពភ្លាមៗ។ អាជ្ញាធរអាកាសយានដ្ឋានប៉ាគីស្ថាន បានបើកឡើងវិញទាំងស្រុងនូវដែនអាកាសរបស់ខ្លួន កាលពីថ្ងៃសៅរ៍ចុងសប្ដាហ៍កន្លងមក។

ជាមួយគ្នានេះ ក្រុមហ៊ុនអាកាសចរណ៍ធំជាងគេរបស់ឥណ្ឌា IndiGo បានឲ្យដឹងថា ខ្លួននឹងចាប់ផ្តើមប្រតិបត្តិការជាបណ្តើរៗលើផ្លូវហោះហើរដែលត្រូវបានបិទនៅមុននេះ៕