បេសកជនជាន់ខ្ពស់ឥណ្ឌាម្នាក់ បាននិយាយថា ជម្លោះ នៅតំបន់កាស្មៀរ គឺជាបញ្ហាទ្វេភាគីជាមួយប៉ាគីស្ថាន ដោយបដិសេធរាល់ការសម្រុះសម្រួលពីខាងក្រៅ ជុំវិញបញ្ហានេះ បើទោះបីជាសហរដ្ឋអាមេរិប្រាប់ថា ខ្លួនចង់សម្របសម្រួលកិច្ចចរចាក៏ដោយ។

នៅថ្ងៃចន្ទ (ទី១២ ឧសភា) នេះ ស្នងការជាន់ខ្ពស់ឥណ្ឌា ប្រចាំនៅប្រទេសសិង្ហបុរី លោក Shilpak Ambule បានប្រាប់ពីធីការិនី Haslinda Amin របស់ទូរទស្សន៍ Bloomberg TV ថា៖ «សម្រាប់ពួកយើង កាស្មៀរ គឺជាបញ្ហាទ្វេភាគី មិនមែនជាបញ្ហាអន្តរជាតិនោះទេ»។

គួរបញ្ជាក់ថា ប្រទេសឥណ្ឌា និងប៉ាគីស្ថាន បានព្រមព្រៀងឈានដល់បទឈប់បាញ់ នៅថ្ងៃទី១០ ឧសភា បន្ទាប់ពីមានការប៉ះទង្គិចគ្នារយៈពេល ៤ថ្ងៃ ដែលនាំឲ្យប្រទេសជិតខាងប្រដាប់អាវុធនុយក្លេអ៊ែរ ទៅកាន់តែកៀកនឹងសង្រ្គាមពេញបន្ទុក។ ហើយសហរដ្ឋអាមេរិកបានប្រាប់ថា ខ្លួនបានជួយសម្របសម្រួលការបន្ថយការកើនឡើងនូវភាពតានតឹងនេះ ប៉ុន្តែឥណ្ឌា បានអះអាងថា បទឈប់បាញ់ គឺជាលទ្ធផលនៃកិច្ចពិភាក្សាទ្វេភាគី។

លោកបណ្ឌិត Ambule បាននិយាយថា បទឈប់បាញ់បានកើតឡើងដោយសារតែប្រមុខប្រតិបត្តិការយោធារបស់ប្រទេសប៉ាគីស្ថាន «បានទាក់ទង» ជាមួយសមភាគីឥណ្ឌារបស់លោក ដោយបន្ថែមថា ទីក្រុងញូវដេលី បានសម្រេចគោលបំណងរបស់ខ្លួនហើយ នោះគឺការ «បំផ្លាញជំរំភេរវករ»។ តែកងទ័ពប៉ាគីស្ថានបានប្រាប់ផ្ទុយវិញថា ឥណ្ឌាបានស្នើសុំបន្ធូរបន្ថយភាពតានតឹងជាមុន។

កាលពីថ្ងៃអាទិត្យ (ទី១១ ខែឧសភា) តាមរយៈបណ្ដាញសង្គម Truth Social ប្រធានាធិបតីអាមេរិកលោក Donald Trump បានលើកឡើងថា លោកនឹងធ្វើការជាមួយទាំងប្រទេសឥណ្ឌា និងប៉ាគីស្ថាន ដើម្បីស្វែងរកដំណោះស្រាយពាក់ព័ន្ធនឹងតំបន់កាស្មៀរ។ តែនៅក្នុងបទសម្ភាសន៍របស់លោក លោកបណ្ឌិត Ambule បានទទូចថា កិច្ចពិភាក្សា នៅតំបន់កាស្មៀរ ត្រូវបានធ្វើឡើងយ៉ាងម៉ត់ចត់ រវាងទីក្រុងញូវដេលី និងអ៊ីស្លាមាបាដ៕