ប្រទេសប៉ូឡូញបានកោះអញ្ជើញឯកអគ្គរដ្ឋទូតរុស្ស៊ី ហើយបានប្រាប់ថា ខ្លួននឹងបិទស្ថានកុងស៊ុលរុស្ស៊ី នៅទីក្រុង Krakow បន្ទាប់ពីមានភស្តុតាង ដែលបង្ហាញថា ទីក្រុងមូស្គូ គឺជាអ្នកត្រូវទទួលខុសត្រូវ ចំពោះអគ្គិភ័យដ៏ធំមួយដែលបានដុតបំផ្លាញស្ទើរតែទាំងស្រុងនូវមជ្ឈមណ្ឌលលក់ទំនិញ នៅទីក្រុងវ៉ាសូវី ក្នុងឆ្នាំ២០២៤ ។

ទំនាក់ទំនងដែលមានភាពតានតឹងរួចហើយ រវាងទីក្រុងវ៉ាសូវី និងទីក្រុងមូស្គូ បានឈានដល់កម្រិតទាបថ្មី គិតចាប់តាំងពីការលុកលុយរបស់រុស្ស៊ីលើអ៊ុយក្រែន ក្នុងឆ្នាំ២០២២។ ប៉ូឡូញលើកឡើងថា តួនាទីរបស់ខ្លួន ក្នុងនាមជាមជ្ឈមណ្ឌល សម្រាប់ផ្ដល់ជំនួយដល់ទីក្រុងគីវ បានធ្វើឲ្យខ្លួនក្លាយជាគោលដៅនៃការបំផ្លិចបំផ្លាញ ការវាយប្រហារតាមអ៊ីនធឺណិត និងការផ្ដល់ព័ត៌មានមិនពិតរបស់រុស្ស៊ី ជាការចោទប្រកាន់ដែលទីក្រុងមូស្គូបដិសេធ។

អ្នកនាំពាក្យក្រសួងការបរទេស លោក Pawel Wronski នៅថ្ងៃចន្ទ (ទី១២ ខែឧសភា) នេះ បាននិយាយថា «ឯកអគ្គរដ្ឋទូតត្រូវបានអញ្ជើញឲ្យទៅក្រសួងនៅម៉ោង ១៥ (ម៉ោងក្នុងស្រុក)»។

កាលពីថ្ងៃអាទិត្យចុងសប្ដាហ៍កន្លងមក នាយករដ្ឋមន្ត្រី លោក Donald Tusk បាននិយាយថា ប្រាកដណាស់ ប្រទេសប៉ូឡូញដឹងថា សេវាកម្មសម្ងាត់របស់រុស្ស៊ីនៅពីក្រោយអគ្គិភ័យដ៏ធំ នៅលើផ្លូវ Marywilska ក្នុងរដ្ឋធានី។

រដ្ឋមន្ត្រីការបរទេស លោក Radoslaw Sikorski បានសរសេរនៅលើបណ្ដាញសង្គម X ថា៖ «ដោយសារតែភស្តុតាងដែលបង្ហាញថា សេវាកម្មពិសេសរបស់រុស្ស៊ី បានប្រព្រឹត្តនូវអំពើបំផ្លិចបំផ្លាញដ៏គួរឲ្យស្អប់ខ្ពើមប្រឆាំងនឹងមជ្ឈមណ្ឌលផ្សារទំនើប នៅផ្លូវ Marywilska ខ្ញុំបានសម្រេចលុបចោលការអនុញ្ញាតរបស់ខ្ញុំចំពោះប្រតិបត្តិការនៃស្ថានកុងស៊ុលសហព័ន្ធរុស្ស៊ី នៅទីក្រុង Krakow»៕