ទីផ្សារភាគហ៊ុនសកលបានហក់ឡើងកាលពីថ្ងៃចន្ទសប្ដាហ៍នេះ បន្ទាប់ពីសហរដ្ឋអាមេរិក និងចិន បានព្រមព្រៀងគ្នាកាត់បន្ថយការដំឡើងពន្ធយ៉ាងហោចណាស់រយៈពេល៩០ថ្ងៃដោយប៉ះពាល់ដល់សង្រ្គាមពាណិជ្ជកម្មរវាងប្រទេសមានសេដ្ឋកិច្ចធំជាងគេទាំងពីរដែលបានចិញ្ចឹមការភ័យខ្លាចនៃវិបត្តិសេដ្ឋកិច្ចសកល។

ប៉ុន្តែការផ្អាកបណ្តោះអាសន្ននេះ បានធ្វើឡើងតិចតួចប៉ុណ្ណោះ ដើម្បីដោះស្រាយការខ្វែងគំនិតគ្នាដែលបាននាំទៅដល់ជម្លោះ រួមទាំងឱនភាពពាណិជ្ជកម្មរបស់សហរដ្ឋអាមេរិកជាមួយប្រទេសចិន និងការទាមទាររបស់ប្រធានាធិបតីអាមេរិក Donald Trump សម្រាប់សកម្មភាពបន្ថែមទៀតពីទីក្រុងប៉េកាំង ដើម្បីប្រយុទ្ធប្រឆាំងនឹងវិបត្តិថ្នាំញៀនហ្វង់តានីល(fentanyl) របស់សហរដ្ឋអាមេរិក។  

ខណៈវិនិយោគិនអបអរសាទរការវិវត្តន៍ជាវិជ្ជមាននេះ ធុរកិច្ចកំពុងស្វែងរកភាពច្បាស់លាស់បន្ថែមទៀត។

ភាគីទាំងពីរបាននិយាយថា នៅក្រោមការផ្អាកជម្លោះពន្ធបណ្តោះអាសន្ន សហរដ្ឋអាមេរិកនឹងកាត់បន្ថយពន្ធបន្ថែមដែលខ្លួនបានដាក់លើការនាំចូលរបស់ចិនកាលពីខែមុនពី១៤៥% មកនៅត្រឹម៣០% សម្រាប់រយៈពេលបីខែខាងមុខ ខណៈការដំឡើងពន្ធរបស់ចិនលើការនាំចូលរបស់សហរដ្ឋអាមេរិកនឹងធ្លាក់ចុះពី ១២៥% នៅត្រឹម ១០%វិញ ។

តំណាងពាណិជ្ជកម្មអាមេរិក លោក Jamieson Greer បាននិយាយក្នុងបទសម្ភាសន៍ជាមួយទូរទស្សន៍ Fox News ថា បន្ថែមពីលើការកាត់បន្ថយពន្ធ ប្រទេសចិនបានយល់ព្រមដកវិធានការតបតការនាំចេញក្រោយថ្ងៃទី ២ខែមេសា រួមទាំងការរឹតបន្តឹងលើរ៉ែ និងមេដែកកម្រដែលប្រើប្រាស់យ៉ាងទូលំទូលាយក្នុងការផលិតបច្ចេកវិទ្យាទំនើបៗ៕