ភ្នំពេញ៖ លទ្ធផលការងារគ្រប់មុខព្រួញរបស់អង្គភាព CMAC ក្នុងរយៈពេល១១ខែ គឺពីខែមករា ដល់ វិច្ឆិកា ឆ្នាំ២០២១នេះ បានទទួលលទ្ធផលប្រកបដោយជោគជ័យ គួរឱ្យកត់សម្គាល់បើទោះជាស្ថិតក្នុងបរិបទសកលនៃការឆ្លងរាលដាលជម្ងឺកូវីដ-១៩ក៏ដោយ។ ក្នុងនោះកិច្ចប្រតិបត្តិការបោសសម្អាតមីន និងសំណ ល់យុទ្ធភណ្ឌសង្គ្រាម រំដោះផ្ទៃដីចម្ការមីន និងចម្ការគ្រាប់សរុបទំហំ៩១.៩១៩.៩៧២ម៉ែត្រក្រឡាស្មើនឹងជាង៩២%នៃផែនការ។ នេះបើតាមហ្វេសប៊ុករបស់ឯកឧត្ដម ហេង រតនា អគ្គនាយកមជ្ឈមណ្ឌលសក ម្មភាពកំចាត់មីនកម្ពុជា ហៅកាត់ ស៊ីម៉ាក់ បានផ្សព្វផ្សាយឱ្យដឹង។

ប្រភពដដែលបន្តថា ក្នុងកិច្ចប្រតិបត្តិការបោសសម្អាតមីន និងសំណល់យុទ្ធភណ្ឌសង្គ្រាម រំដោះផ្ទៃដីចម្ការមីន និងចម្ការគ្រាប់ជាង ៩២% នៃផែនការនេះ គឺបានរុករកឃើញ និងកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទសរុបចំនួន ៨២.១៣៨គ្រាប់ ក្នុងនោះគ្រាប់មីនប្រឆាំងមនុស្សចំនួន១៦.១៣៨គ្រាប់ មីនប្រឆាំងរថក្រោះចំនួន៣២៣គ្រាប់ គ្រាប់បែកទម្លាក់ពីយន្ដហោះ៣៩គ្រាប់ គ្រាប់បែ កចង្កោម ៨.០៩០គ្រាប់ មីនច្នៃចំនួន១៧គ្រាប់ និងគ្រាប់យុទ្ធភណ្ឌមិនទាន់ផ្ទុះគ្រប់ប្រភេទមានចំនួន៥៧.៥៣១គ្រាប់។

ក្នុងរយៈពេល១១ខែនេះដែរ អង្គភាពស៊ីម៉ាក់ និងបណ្តាញស្ម័គ្រចិត្តតាមភូមិឃុំស្រុកបានចុះផ្សព្វផ្សាយអប់រំការយល់ដឹងពីគ្រោះថ្នាក់ដោយសារមីន និងសំណល់ជាតិផ្ទុះពីសង្គ្រាមដល់ក្រុមគោលដៅបានចំ នួនជាង១៦,០០០ លើក ដោយចុះជួបតាមខ្នងផ្ទះមានចំនួនជាង ៦០០,០០០ខ្នងផ្ទះ មានប្រជាពលរដ្ឋចូលរួមសរុបចំនួនជិតមួយលាននាក់។ ជាមួយគ្នានេះដែរ ក្រុមការងារក៏បានចុះពិនិត្យទីតាំងគ្រាប់មីននិងយុទ្ធភណ្ឌមិនទាន់ផ្ទុះ ដែលប្រជាពលរដ្ឋបានរាយការណ៍ និងបានកម្ទេចចោលគ្រាប់មីន និងយុទ្ធភណ្ឌមិនទាន់ផ្ទុះគ្រប់ប្រភេទបានចំនួនជិត ១៥,៤០០គ្រាប់ និងអាវុធធុនស្រាលមួយចំនួនផងដែរ។

ប្រភពដដែលបញ្ជាក់បន្ថែមថា ក្នុងឆ្នាំ២០២២ ខាងមុខ អង្គភាពស៊ីម៉ាក់មានផែនការរំដោះផៃ្ទដីរងការគំរាមកំហែងដោយសារគ្រាប់មីន និងសំណល់យុទ្ធភណ្ឌសង្គ្រាមជាង១២៥គីឡូម៉ែត្រក្រឡា។ ក្នុងផែន ការនេះ កំលាំងអង្គភាពស៊ីម៉ាក់បានទទួលការគាំទ្រពីគម្រោងរបស់រាជរដ្ឋាភិបាល គម្រោងជំនួយរបស់រដ្ឋាភិបាលជប៉ុន គម្រោងជំនួយតាមរយ:ដេញថ្លៃពី UNDP/អាជ្ញាធរមីន គម្រោងជំនួយរបស់រដ្ឋាភិបាល ចិន គម្រោងជំនួយរបស់អង្គការជំនួយប្រជាជនណរ័វេស្ស(NPA ដែលទទួលបានពីរដ្ឋាភិបាលណ័រវេស្ស និងអាម៉េរិក) គម្រោងជំនួយអង្គការ APOPO របស់រដ្ឋាភិបាលប៊ែលហ្សិក គម្រោងជំនួយរបស់អង្គការ JMAS និងគម្រោងជាមួយអង្គការ MAG សរុបមានចំនួន ២៥ គម្រោង និងអាចមានលទ្ធភាពពង្រី កបន្ថែម ដើម្បីសម្រេចមហិ្ឆតាផែនការឆ្នាំ២០២២ ខាងមុខនេះ៕​ដោយ៖ គង់ ឌិន