អ្នកគោរពបូជាចំពោះព្រះម៉ែ Virgin Mary រាប់សែននាក់ កាលពីថ្ងៃចន្ទទី១២ ឧសភា បានមកប្រមូលផ្តុំគ្នានៅទីសក្ការៈបូជា Fatima ក្នុងប្រទេសព័រទុយហ្គាល់ ដើម្បីបួងសួងដល់សម្តេចប៉ាប លីអូ ទី១៤ ដែលទើបតែងតាំងថ្មី និងបួងសួងសម្រាប់សន្តិភាពពិភពលោក។

មន្ត្រីព្រះវិហារ បាននិយាយថា អ្នកធ្វើធម្មយាត្រាប្រហែល ២៧០.០០០នាក់ មកពីទូទាំងប្រទេសព័រទុយហ្គាល់ អេស្ប៉ាញ ប៉ូឡូញ និងមកពីប្រទេសផ្សេងៗដូចជា សហរដ្ឋអាមេរិក ប៉ារ៉ាហ្គាយ និងកោះតៃវ៉ាន់ បានមកដល់ទីសក្ការបូជាដ៏ល្បីល្បាញបំផុតរបស់សាសនាកាតូលិក។

នៅក្នុងសុន្ទរកថាដំបូងរបស់ព្រះអង្គទៅកាន់ហ្វូងមនុស្សនៅទីលាន St. Peter ចាប់តាំងពីការជាប់ឆ្នោតរបស់ព្រះអង្គមក សម្តេចប៉ាប លីអូ បានអំពាវនាវដល់ប្រទេសមហាអំណាចពិភពលោក «កុំឱ្យមានសង្រ្គាមតទៅទៀត»។

អ្នកដើរធម្មយាត្រាជនជាតិព័រទុយហ្គាល់ម្នាក់បាននិយាយថាអ្នកស្រីសង្ឃឹមថា សម្តេច ប៉ាប លីអូ នឹងបន្តដំណែលរបស់សម្តេចប៉ាប ហ្វ្រង់ស៊ីស អំពី «មនុស្សជាតិ និងភាពស្មោះត្រង់»។

រៀងរាល់ថ្ងៃទី១២ និងទី១៣ ខែឧសភា អ្នកធ្វើធម្មយាត្រារាប់ពាន់នាក់ធ្វើដំណើរទៅកាន់ទីសក្ការៈបូជាFatima ដែលពួកគេភាគច្រើនមកពីឆ្ងាយ។