យោងតាមអាជ្ញាធរបានឱ្យដឹងថា បេក្ខជនអភិបាលក្រុងម្នាក់នៅរដ្ឋ Veracruz ភាគខាងកើតប្រទេសម៉ិកស៊ិក ត្រូវបានសម្លាប់ នៅពេលដែលលោកស្រី កំពុងស្វាគមន៍អ្នកគាំទ្របន្ទាប់ពីការប្រមូលផ្តុំគ្នាសម្រាប់ការបោះឆ្នោត។

ឧក្រិដ្ឋជន ជិះនៅលើម៉ូតូ បានបើកការបាញ់ប្រហារ ខណៈបេក្ខជនរបស់គណបក្សកាន់អំណាច Morena សម្រាប់រដ្ឋាភិបាលតំបន់ Texistepec លោកស្រីYesenia Lara Gutierrez កំពុងនិយាយទៅកាន់អ្នកគាំទ្របន្ទាប់ពីព្រឹត្តិការណ៍យុទ្ធនាការមួយ។

ការិយាល័យរដ្ឋអាជ្ញារដ្ឋ Veracruz បានរាយការណ៍ថា មនុស្សបីនាក់ទៀតបានស្លាប់ និងបីនាក់ផ្សេងទៀតបានរងរបួសនៅក្នុងការវាយប្រហារនេះ។

លោកស្រី Lara Gutierrez បានផ្សាយផ្ទាល់ផ្នែកនៃព្រឹត្តិការណ៍នៅលើគណនីហ្វេសប៊ុករបស់លោកស្រី។ ការផ្សាយផ្ទាល់បានបញ្ចប់ភ្លាមៗ នៅពេលដែលការវាយប្រហារបានចាប់ផ្តើម ហើយមនុស្សជាច្រើនបានរត់គេចចេញពីការបាញ់កាំភ្លើង។ ប្រធានាធិបតី លោកស្រី Claudia Sheinbaum បាននិយាយនៅថ្ងៃអង្គារនេះថា ហេតុផលនៅតែពុំទាន់ដឹងនៅឡើយ។

ប្រទេសម៉ិកស៊ិក បានប្រឈមនឹងអំពើហិង្សាក្នុងការបោះឆ្នោតក្នុងរយៈពេលប៉ុន្មានឆ្នាំថ្មីៗនេះ ដោយការបោះឆ្នោតប្រធានាធិបតីឆ្នាំ២០២៤ គឺជាការបង្ហូរឈាមបំផុតរហូតមកដល់ពេលនេះ ដោយមានបេក្ខជនយ៉ាងហោចណាស់៣៩នាក់ត្រូវបានគេសម្លាប់។