ប្រធានាធិបតីម៉ិកស៊ិក លោកស្រី Claudia Sheinbaum កាលពីថ្ងៃចន្ទ បានរិះគន់ការសម្រេចចិត្តរបស់សហរដ្ឋអាមេរិកក្នុងការផ្អាកការនាំចូលគោក្របីរបស់ប្រទេសម៉ិកស៊ិករយៈពេល១៥ថ្ងៃ ដោយចាត់ទុកវិធានការនេះថាមិនសមហេតុផល និងទាមទារឱ្យមានការគោរពគ្នាទៅវិញទៅមកក្នុងទំនាក់ទំនងទ្វេភាគី។

លោកស្រី Sheinbaum បាននិយាយក្នុងអំឡុងសន្និសីទសារព័ត៌មានប្រចាំថ្ងៃរបស់លោកស្រីថា «យើងមិនយល់ស្របចំពោះវិធានការនេះទេ»។ «គ្មានហេតុផលអ្វី ដែលត្រូវបិទព្រំដែនសម្រាប់ការនាំចូលគោក្របីរបស់ម៉ិកស៊ិកឡើយ»។

ភាគីអាមេរិក បានលើកឡើងពីតម្រូវការដើម្បីវាយតម្លៃឡើងវិញនូវកិច្ចខិតខំប្រឹងប្រែងរួម ដើម្បីគ្រប់គ្រងសត្វប៉ារ៉ាស៊ីតលើសត្វចិញ្ចឹម ប៉ុន្តែ លោកស្រី Sheinbaum បានសង្កត់ធ្ងន់ថា ម៉ិកស៊ិកបានធ្វើការយ៉ាងជិតស្និទ្ធជាមួយអាជ្ញាធរសហរដ្ឋអាមេរិកតាំងពីដើមរៀងមក។ 

លោកស្រី Sheinbaum សង្ឃឹមថា បម្រាមនេះនឹងត្រូវបានដកចេញក្នុងពេលឆាប់ៗ និងបាននិយាយថា លោកស្រីមិនរំពឹងថានឹងមានការខាតបង់ធំដុំនោះទេ ដោយសារតែលក្ខណៈបណ្តោះអាសន្ននៃវិធានការនេះ។