នាយករដ្ឋមន្ត្រីអាល់បានី លោក Edi Rama ទទួលបានអំណាចអាណត្តិទី៤ ដែលមិនធ្លាប់មានពីមុនមក ខណៈដែលគណបក្សសង្គមនិយម (Socialist Party) របស់លោក បានរំកិលទៅកៀកនឹងជ័យជម្នះ នៅក្នុងការបោះឆ្នោតសភា កាលពីថ្ងៃអាទិត្យចុងសប្ដាហ៍កន្លងមក បន្ទាប់ពីលទ្ធផលនៃការរាប់សន្លឹកឆ្នោតជិតបញ្ចប់ទាំងស្រុង បានបង្ហាញនៅថ្ងៃអង្គារ (ទី១៣ ខែឧសភា) នេះ។

តួលេខផ្លូវការពីគណៈកម្មាធិការរៀបចំការបោះឆ្នោត បានបង្ហាញថា ដោយការរាប់សន្លឹកឆ្នោតបានចំនួន ៩៤ភាគរយ គណបក្សសង្គមនិយម (PS) មានសន្លឹកឆ្នោត ៥២ភាគរយ នាំមុខគណបក្សប្រជាធិបតេយ្យ (PD) នៅលំដាប់ទី២ ដែលទទួលបានការគាំទ្រ ៣៤ភាគរយ តែយ៉ាងណាក្ដី អ្នកសង្កេតការណ៍អន្តរជាតិ បានបង្ហាញមន្ទិលសង្ស័យ អំពីភាពត្រឹមត្រូវនៃការបោះឆ្នោតនេះ។ គណៈកម្មាធិការរៀបចំការបោះឆ្នោតរដ្ឋ គ្រោងប្រកាសលទ្ធផលពេញលេញនៅថ្ងៃអង្គារនេះតែម្ដង។

ប្រសិនបើត្រូវបានបញ្ជាក់ជាផ្លូវការនោះ លទ្ធផលនេះនឹងបង្ហាញពីភាពល្អប្រសើរជាងមុនលើសការបោះឆ្នោតចុងក្រោយ នៅពេលដែលបក្ស PS ទទួលបានសំឡេង ៤៩ភាគរយ ហើយវានឹងផ្តល់ឲ្យលោក Rama នូវសំឡេងភាគច្រើនគ្រប់គ្រាន់ ក្នុងការបង្កើតរដ្ឋាភិបាល។ ហើយវាក៏នឹងអាចឲ្យលោកបន្តធ្វើការផងដែរ ដើម្បីបំពេញតាមការសន្យារបស់លោក ក្នុងការនាំអាល់បានីចូលសហភាពអឺរ៉ុប នៅឆ្នាំ២០៣០ ទោះបីជាអ្នកជំនាញជាច្រើនលោកថា ជាការមានសុទិដ្ឋិនិយមជ្រុលពេកក៏ដោយ៕