អភិបាលក្រុង នៅថ្ងៃអង្គារ (ទី១៣ ខែឧសភា) នេះ បាននិយាយថា ប្រទេសថៃបានប្រកាសបញ្ចប់ប្រតិបត្តិការស្វែងរកនៅទីតាំងនៃអគារខ្ពស់ ក្នុងទីក្រុងបាងកក ដែលបាន និងកំពុងស្ថិតក្នុងដំណើរការសាងសង់ តែបានបាក់រលំ ក្នុងអំឡុងពេលមានរញ្ជួយដី កាលពីថ្ងៃទី២៨ ខែមីនា ជាហេតុការណ៍ដែលបានសម្លាប់កម្មករសំណង់ជាច្រើននាក់។

ការិយាល័យសវនកម្មរដ្ឋកម្ពស់ ៣០ជាន់ គឺជាអគារតែមួយគត់នៅក្នុងរដ្ឋធានីរបស់ប្រទេសថៃ ដែលបានបាក់រលំ ដោយសាររំញ័រដែលបណ្តាលមកពីរញ្ជួយដីកម្រិត ៧,៧រ៉ិចទ័រ ដែលបានកើតមាននៅភាគកណ្តាលសហភាបមីយ៉ាន់ម៉ា ចម្ងាយប្រហែល ១.០២០គីឡូម៉ែត្រ។

ការស៊ើបអង្កេតកំពុងដំណើរការទៅ ដើម្បីរកមូលហេតុដែលអគារនេះបាក់រលំយ៉ាងងាយស្រួល ខណៈដែលអគារផ្សេងទៀតនៅក្នុងទីក្រុង ឈរយ៉ាងរឹងមាំ។ រញ្ជួយដី និងរំញ័រនៃកម្រិតនោះ គឺកម្រកើតឡើងណាស់ នៅប្រទេសថៃ ហើយការរញ្ជួយនេះ បានបង្កឲ្យមានការភ័យស្លន់ស្លោនៅក្នុងទីក្រុង ដែលបណ្តាលឲ្យមានការផ្អាកសកម្មភាពនានាដោយភាគច្រើន នៅថ្ងៃនោះ។

អាជ្ញាធរបានរកឃើញសពជនរងគ្រោះចំនួន ៨៩នាក់ ពីគំនរបាក់បែកនៃអគារនេះ ហើយ ៧នាក់ទៀតកំពុងបាត់ខ្លួន ដោយសារគ្រោះថ្នាក់មួយ ក្នុងចំណោមហេតុការណ៍ដ៏អាក្រក់បំផុត នៅប្រទេសថៃ ដែលបានឆក់យកជីវិតមនុស្ស ៩៦នាក់។ នៅប្រទេសមីយ៉ាន់ម៉ា មនុស្សជាង ៣.៧០០នាក់ បានបាត់បង់ជីវិត៕