នាយករដ្ឋមន្ត្រីកាណាដា លោក Mark Carney ដែលបានឈ្នះការបោះឆ្នោតកាលពីខែមុនលើការប្តេជ្ញាថានឹងតតាំងនឹងលោកប្រធានាធិបតីអាមេរិក Donald Trump បានបើកបង្ហាញគណៈរដ្ឋមន្ត្រីថ្មីរបស់លោកកាលពីថ្ងៃអង្គារ (១៣ ឧសភា) ដែលលោកបាននិយាយថា នឹងជួយកំណត់ទំនាក់ទំនងថ្មីជាបន្ទាន់ជាមួយទីក្រុងវ៉ាស៊ីនតោន។

លោក Carney បានកាត់ចំនួនរដ្ឋមន្ត្រីមកត្រឹម ២៩រូប ពីមន្រ្តី ៣៩រូបពីមុន ក្រោមការដឹកនាំរបស់លោក Justin Trudeau ប៉ុន្តែបានរក្សាតួអង្គសំខាន់ៗមួយចំនួននៅក្នុងមុខតំណែង ដូចជាលោករដ្ឋមន្ត្រីហិរញ្ញវត្ថុ Francois-Philippe Champagne និងលោក Dominic LeBlanc ដែលទទួលបន្ទុកផ្នែកពាណិជ្ជកម្មរបស់សហរដ្ឋអាមេរិក។

លោកស្រី Melanie Joly ផ្លាស់ពីប្រមុខកិច្ចការបរទេសទៅដឹកនាំផ្នែកឧស្សាហកម្ម បន្ទាប់ពីរយៈពេល ៤ឆ្នាំ ហើយតំណែងរដ្ឋមន្រ្តីការបរទេសនេះត្រូវបានជំនួសដោយលោកស្រី Anita Anand។ លោកស្រី Chrystia Freeland ដែលបានលាលែងពីតំណែងជារដ្ឋមន្ត្រីហិរញ្ញវត្ថុកាលពីខែធ្នូឆ្នាំមុន នៅរក្សាមុខងារជារដ្ឋមន្ត្រីក្រសួងដឹកជញ្ជូន និងពាណិជ្ជកម្មផ្ទៃក្នុង។

ការសន្យាភ្លាមៗរបស់លោក Carney គឺការកាត់បន្ថយពន្ធក្នុងប្រទេស និងបញ្ចប់របាំងពាណិជ្ជកម្មទាំងអស់ក្នុងចំណោមខេត្តទាំង១០ ត្រឹមថ្ងៃទី០១ ខែកក្កដា។ លោកសង្កត់ធ្ងន់ថា កាណាដាត្រូវតែចំណាយប្រាក់រាប់ពាន់លាន ដើម្បីចាប់ផ្តើមផ្លាស់ប្តូរការផ្តោតអារម្មណ៍របស់សេដ្ឋកិច្ច ឱ្យឆ្ងាយពីសហរដ្ឋអាមេរិក ក៏ដូចជាការបញ្ចប់ឧបសគ្គចំពោះពាណិជ្ជកម្មផ្ទៃក្នុង និងកាត់បន្ថយការចំណាយសាធារណៈ៕