សៀមរាប៖ លោកជំទាវកិត្តិសង្គហបណ្ឌិត មែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភាព្រឹទ្ធសភា ថ្លែងថា ព្រឹត្ដិការណ៍រម្លឹកគុណអង្គរ ក៏នឹងក្លាយយុទ្ធនាការជំរុញឱ្យបានការចូលរួមឧបត្ថម្ភគាំទ្របន្ថែមទៀត ពីវិស័យឯកជន សម្រាប់ជាគុណប្រយោជន៍ដល់កិច្ចការអភិរក្សបេតិកភណ្ឌជាតិនេះ ហើយដែលនឹងក្លាយជានិមិត្តរូប មិត្តភាព និងសាមគ្គីភាពទាំងជាតិ និងអន្តរជាតិផងដែរ។

ពិធីនេះប្រារព្ធឡើងនៅព្រឹកថ្ងៃទី១៤ខែធ្នូនេះនៅខាងមុខប្រាសាទអង្គរវត្ត ដោយមានការអញ្ជើញ​ចូលរួមពីលោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ ឯកឧត្ដម ទៀ សីហា​ អភិបាលខេត្ដសៀមរាប ​និងស្ថាប័នពាក់ព័ន្ធ ព្រមទាំងប្រជាពលរដ្ឋចូលរួម​ជាច្រើន​នាក់។

លោកជំទាវ ម៉ែន សំអន មានប្រសាសន៍ថា សមិទ្ធផលដ៏អស្ចារ្យនៃរមណីយដ្ឋាន​អង្គរ ដែលបានកើតចេញពីការ ដឹកនាំប្រកបដោយ​គតិបណ្ឌិត​របស់សម្ដេចតេជោ ហ៊ុន សែន នាយករដ្ឋមន្រ្តី និងកិច្ចខិតខំប្រឹងប្រែងអស់ពី កម្លាំងកាយចិត្ត ប្រាជ្ញាស្មារតីរបស់​ឥស្សរជនជាតិ​ផ្សេងៗទៀត ដែលជានិច្ចកាលតែងតែចាត់ទុកកិច្ចអភិរក្សបេតិកភណ្ឌវប្បធម៌ជាតិ ដើម្បី​ជាប្រយោជន៍រួម ។

លោកជំទាវកិត្តិសង្គហបណ្ឌិត មែន សំអន បានបន្ដថា ពិធីរំលឹកគុណអង្គរនេះ ធ្វើឡើងក្នុងគោល​បំណង​ដើម្បីអបសាទរការចុះរមណីយដ្ឋានអង្គរក្នុង​បញ្ជីបេតិកភណ្ឌពិភពលោក​ កាល​ពីថ្ងៃទី ១៤ខែធ្នូ ឆ្នាំ១៩៩២ ក៏​ដូចជារំលឹកគុណដល់​បុព្វការីជន​ជំនាន់មុន អតីត​ព្រះមហាក្សត្រ​គ្រប់​ជំនាន់មុនផងដែរ។

លោកជំទាវ បានបន្ថែមថា តាមរយៈពិធីនេះ ធ្វើឱ្យប្រជាពលរដ្ឋខ្មែរគ្រប់រូប មានកាតព្វកិច្ច ក្នុងការ​ចូលរួម​អភិរក្ស និងការពារអង្គរ ​ដែលមិនត្រឹមតែ ​ជារតនសម្បត្តិនៃបេតិកភណ្ឌជាតិប៉ុណ្ណោះទេ ក៏ប៉ុន្តែវាជាសម្បត្តិវប្បធម៌របស់មនុស្សជាតិទាំងមូលផងដែរ។

ព្រឹត្តិការណ៍ដ៍សំខាន់នេះ ក្រៅពីក្នុងគោលដៅលើកស្ទួយពាក្យស្លោកកម្ពុជា ជា​ព្រះរាជា​ណា​ចក្រ​អច្ឆរិយៈ ​ក៏ដើម្បីបង្ហាញមោទកភាពជាតិ ​ដែលជាមហាអំណាចវប្បធម៌ និងមានប្រវត្តិសាស្ត្រ​យូរ​លង់ណាស់មកហើយ ជាពិសេស​គឺការបង្កើតឱ្យមានយន្តការនៃការរំលឹក​គុណអង្គរ​ប្រចាំឆ្នាំ​ចាប់ពីឆ្នាំ២០២២ ខាងមុខននេះទៅ ក្នុងទិសដៅរួមចំណែកជាមួយផែនការមេវិស័យទេសចរណ៍ ខេត្តសៀមរាប២០២១-២០៣៥​ ជាមួយក្រុសួង/ស្ថាប័នពាក់ព័ន្ធ ក្នុងការធ្វើឱ្យរស់រានឡើងវិញនូវ​វិស័យទេសចរណ៍កម្ពុជា តាមរយៈការបំផុសឱ្យភ្ញៀវទេសចរជាតិ ​និងអន្តរជាតិ ​០១នាក់ ចូលរួម​ទស្សនាអង្គរ ​យ៉ាងហោចណាស់០១ដង​ ក្នុង០១ឆ្នាំ​ ពោល​គឺមកទស្សនាហើយ ចង់​មក​ទស្សនា​ទៀត។

ពិធីបុណ្យរំលឹកគុណអង្គរ មានរយៈពេលបីថ្ងៃចាប់ពីថ្ងៃទី១៤ ដល់១៦ ខែធ្នូ ឆ្នាំ២០២១ ដើម្បី​បង្ហាញ​ជូនសាធារណជនជាតិ និងអន្តរជាតិ ​បានស្វែងយល់​ ក្នុងនោះមានដូចជាពិធីសាសនា និង​ព្រឹត្តិការណ៍​សំដែងសិល្បៈនានា ​ការសំដែងសិល្បៈល្ខោនស្បែកធំ នឹងមានរៀបចំស្តង់ពិព័រណ៍​សមិទ្ធផល និងសកម្មភាពការងារ ​ដែលសម្រេចបាននាពេលកន្លងមករបស់អាជ្ញាធរជាតិអប្សរា ក្នុងគោលបំណងស្វែងយល់បន្ថែម ​ដើម្បីទស្សនាសកម្មភាពការងារជាក់ស្ដែងនានារបស់ក្រុម ការងារជំនាញនីមួយៗផងដែរ៕