រដ្ឋមន្ត្រីការបរទេសស្តីទីរបស់ប្រទេសលីប៊ី លោក Taher Al-Baour បានគូសបញ្ជាក់កាលពីថ្ងៃអង្គារថា ការប្តេជ្ញាចិត្តរបស់រដ្ឋាភិបាលលីប៊ី ក្នុងការស្តារស្ថិរភាព នៅក្នុងប្រទេសនេះ មួយថ្ងៃបន្ទាប់ពីការប៉ះទង្គិចគ្នាដោយហិង្សាបានផ្ទុះឡើង នៅក្នុងរដ្ឋធានីទ្រីប៉ូលី។

លោក Al-Baour បានធ្វើការអត្ថាធិប្បាយក្នុងអំឡុងពេលកិច្ចប្រជុំ នៅទីក្រុងទ្រីប៉ូលី ជាមួយមន្ត្រីការទូតបរទេសប្រចាំប្រទេសលីប៊ី ក្នុងអំឡុងពេលដែលលោកបានផ្តល់ការពន្យល់យ៉ាងទូលំទូលាយ ស្តីពីសន្តិសុខ និងការវិវឌ្ឍផ្នែកនយោបាយចុងក្រោយ នៅក្នុងទីក្រុងនេះ។

ក្រសួងការបរទេស បាននិយាយនៅក្នុងសេចក្តីថ្លែងការណ៍មួយថា៖«លោក Al-Baour បានសង្កត់ធ្ងន់លើការប្តេជ្ញាចិត្តរបស់រដ្ឋាភិបាលឯកភាពជាតិ ក្នុងការគាំទ្រដំណើរការនៃស្ថិរភាព និងការពង្រឹងសសរស្តម្ភរបស់រដ្ឋ និងស្ថាប័នរបស់ខ្លួន ដែលចូលរួមចំណែកក្នុងការពង្រឹងអធិបតេយ្យភាពជាតិ»។

ការប៉ះទង្គិចគ្នាដោយហិង្សា បានផ្ទុះឡើងកាលពីថ្ងៃចន្ទ នៅទីក្រុងទ្រីប៉ូលី រវាងក្រុមប្រដាប់អាវុធជាគូប្រជែង ចំពេលមានរបាយការណ៍អំពីការសម្លាប់លោក Abdel Ghani al-Kikli ដែលបានដឹកនាំក្រុមគាំទ្រស្ថិរភាព ជាក្រុមប្រដាប់អាវុធដ៏មានឥទ្ធិពលមួយមានទំនាក់ទំនងជាមួយក្រុមប្រឹក្សាប្រធានាធិបតី ដែលបំពេញមុខងាររបស់ប្រមុខរដ្ឋលីប៊ី។

សេវាវេជ្ជសាស្រ្តសង្គ្រោះបន្ទាន់ បាននិយាយកាលពីថ្ងៃអង្គារថា ការប៉ះទង្គិចគ្នានេះ បានសម្លាប់មនុស្សយ៉ាងហោចណាស់ ៦នាក់។

ក្រសួងមហាផ្ទៃ បាននិយាយកាលព្រឹកថ្ងៃអង្គារថា ស្ថានភាពសន្តិសុខនៅទីក្រុងទ្រីប៉ូលី គឺ «មានសុវត្ថិភាព និងស្ថិរភាព» ហើយថា សេវាសន្តិសុខទាំងអស់កំពុង «អនុវត្តតួនាទីរបស់ពួកគេប្រកបដោយប្រសិទ្ធភាពក្នុងការថែរក្សាសន្តិសុខ និងសណ្តាប់ធ្នាប់សាធារណៈ»។