ប្រទេសអ៊ីរ៉ង់ បានស្វាគមន៍សេចក្តីប្រកាសរបស់គណបក្សពលករឃើដ (PKK) អំពីការរំលាយខ្លួនឯង ដោយហៅវាថា ជាវិធានការដ៏សំខាន់មួយឆ្ពោះទៅរកការបញ្ចប់អំពើហិង្សា និងការជំរុញសន្តិសុខ ក្នុង     តំបន់។

អ្នកនាំពាក្យក្រសួងការបរទេសអ៊ីរ៉ង់លោក Esmaeil Baghaei បាននិយាយនៅក្នុងសេចក្តីថ្លែងការណ៍មួយថា ការសម្រេចចិត្តនេះ គឺជា«ជំហានដ៏សំខាន់មួយ»ចាកចេញពីជម្លោះប្រដាប់អាវុធ ដោយសម្តែងក្តីសង្ឃឹមថា ដំណើរការនេះ នឹងជួយជំរុញសន្តិភាព និងស្ថិរភាព នៅក្នុងប្រទេសទួរគី និងតំបន់ទាំងមូល។

សេចក្តីថ្លែងការណ៍នេះ បានធ្វើឡើងមួយថ្ងៃបន្ទាប់ពីគណបក្សពលករឃើដ (PKK) បានប្រកាសថា ខ្លួននឹងរំសាយ និងបញ្ឈប់ការបះបោរប្រដាប់អាវុធរយៈពេលជាច្រើនទសវត្សរ៍។ ចំណាត់ការនេះ ធ្វើឡើងបន្ទាប់ពីមានការអំពាវនាវកាលពីខែកុម្ភៈពីមេដឹកនាំ PKK លោក Abdullah Ocalan ដែលកំពុងជាប់ពន្ធនាគារ ដោយជំរុញឲ្យក្រុមនេះទម្លាក់អាវុធ។

ដោយត្រូវបានចាត់តាំងជាអង្គការភេរវកម្មដោយប្រទេសទួរគី សហរដ្ឋអាមេរិក និងសហភាពអឺរ៉ុប គណបក្សពលករឃើដ (PKK) បានធ្វើការបះបោររយៈពេល ៤ទសវត្សរ៍ប្រឆាំងនឹងរដ្ឋទួរគី ដោយដំបូងឡើយស្វែងរករដ្ឋឃើដឯករាជ្យមួយ។

ទីក្រុងអង់ការ៉ាជារឿយៗធ្វើប្រតិបត្តិការយោធាឆ្លងព្រំដែនប្រឆាំងនឹងក្រុម PKK នៅភាគខាងជើងប្រទេសអ៊ីរ៉ាក់ ជាកន្លែងដែលក្រុមនេះរក្សាទីស្នាក់ការ និងកន្លែងលាក់ខ្លួន និងកំណត់គោលដៅសាខារបស់ក្រុមនេះ នៅក្នុងប្រទេសស៊ីរី។