អាជ្ញាធរសុខាភិបាលក្នុងតំបន់ បានប្រាប់ឲ្យដឹងថា ការវាយប្រហាររបស់យោធាអ៊ីស្រាអែល បានសម្លាប់ជនជាតិប៉ាឡេស្ទីនយ៉ាងតិច ៧០នាក់នៅទូទាំងតំបន់ហ្កាហ្សាស្ទ្រីប នៅថ្ងៃពុធ (ទី១៤ ខែឧសភា) នេះ ជាការបង្កើនគួរឲ្យកត់សម្គាល់នៃការទម្លាក់គ្រាប់បែក ខណៈដែលប្រធានាធិបតីសហរដ្ឋអាមេរិក លោក Donald Trump បានបន្តដំណើរទស្សនកិច្ចរបស់លោក នៅតំបន់មជ្ឈិមបូព៌ា។

ក្រុមគ្រូពេទ្យបឋមសង្គ្រោះ បានប្រាប់ថា អ្នកស្លាប់ភាគច្រើន ដែលក្នុងនោះរួមមានទាំងស្ត្រី និងកុមារផងដែរនោះ បណ្តាលមកពីការវាយប្រហារតាមអាកាសយ៉ាងសន្ធាប់របស់អ៊ីស្រាអែល ដែលបានកំណត់គោលដៅលើផ្ទះសម្បែងជាច្រើនខ្នង នៅក្នុងទីក្រុង Jabalia ភាគខាងជើងតំបន់ហ្កាហ្សា។

សេចក្តីថ្លែងការណ៍របស់ក្រសួងសុខាភិបាល បានឲ្យដឹងថា៖ «ជនរងគ្រោះមួយចំនួននៅតែស្ថិតនៅលើផ្លូវ និងនៅក្រោមគំនរបាក់បែក ដែលក្រុមសង្គ្រោះ និងក្រុមសង្គ្រោះបន្ទាន់ស៊ីវិល មិនអាចចូលទៅជួយ (ពួកគេ) បាន»។

យោធាអ៊ីស្រាអែលមិនមានការអត្ថាធិប្បាយអ្វីភ្លាមៗឡើយ តែបានប្រាប់ថា ខ្លួនកំពុងព្យាយាមផ្ទៀងផ្ទាត់របាយការណ៍ទាំងនោះ។ នៅថ្ងៃទី១៤ ខែឧសភានេះ សារព័ត៌មានអ៊ីស្រាអែល បានដកស្រង់សម្តីមន្ត្រីសន្តិសុខដែលនិយាយថា ពួកគេជឿថា មេដឹកនាំក្រុមហាម៉ាស លោក Mohammad Sinwar និងមន្ត្រីជាន់ខ្ពស់ផ្សេងទៀតត្រូវបានសម្លាប់នៅក្នុងការវាយប្រហារកាលពីថ្ងៃទី១៣ ខែឧសភា ជាអ្វីដែលយោធាអ៊ីស្រាអែលបានពិពណ៌នាថា ជាទីបញ្ជាការ និងលេណដ្ឋានលាក់ខ្លួន នៅពីក្រោមមន្ទីរពេទ្យអឺរ៉ុប ក្នុងទីក្រុង Khan Younis ភាគខាងត្បូង។ ពាក់ព័ន្ធនឹងសេចក្ដីរាយការណ៍នេះ មិនមានការបញ្ជាក់ណាមួយឡើយ ទាំងពីយោធាអ៊ីស្រាអែល ឬក្រុមហាម៉ាស៕